«Ortalyq Aziia Elektroenergetikalyq Korporatsiiasyn» (TsAEK) baqylaýda ustap kelgen kásipkerler Aleksandr Klebanov pen Sergei Kan 2023 jyly «Ekibastuzjylýenergo» JShS-in nebári 200 myń teńgege satyp jibergen. Bul týraly aqparat aktsionerlik qoǵamnyń qarjylyq eseptiliginde kórsetilgen, dep habarlaidy Dalanews.kz.
Aktivter memleketke ótti
KASE saitynda jariialanǵan esep boiynsha, kompaniianyń negizgi aktivi — jalpy quny 1,8 mlrd teńge bolatyn jylý jelileri 2023 jyldyń maýsymynda Ekibastuz qalalyq ekonomika jáne qarjy bólimine teńgerimge berilgen. Al 2024 jyly TsAEK óndiristik jáne ákimshilik ǵimarattardy qala ákimdigine ótkizgen.
Atalǵan aktivterdi berý nátijesinde kompaniia 4,9 mlrd teńge kóleminde shyǵynǵa batqan. Budan bólek, kúl úiindilerin qalpyna keltirý boiynsha mindettemelerdi esepten shyǵarý kezinde taǵy 1,9 mlrd teńge kóleminde zalal jazylǵan.
«2024 jylǵy 1 tamyzda „Ekibastuzjylýenergo“ JShS barlyq múlkin memleket menshigine tegin ótkizgendikten jáne atalǵan aktivterdi senimgerlik basqarý kelisimsharttary basqa kompaniiamen jasalǵandyqtan, top basshylyǵy JShS-tegi 100% úlesti úshinshi tarapqa 200 myń teńgege satý týraly sheshim qabyldady», – delingen qujatta.
Qaryzdardan qutylý
Málimetterge qaraǵanda, «Ekibastuzjylýenergony» satý arqyly oligarhtar kompaniianyń birqatar mindettemelerinen qutylǵan. Atap aitqanda, 2026 jylǵa deiin óteýi tiis 400 mln teńge jáne 2030 jyldyń sońyna deiin tólenýi tiis 4,9 mlrd teńge mólsherindegi qaryzdardan bosap otyr. Eseptilikte TsAEK-tiń 4,2 mlrd teńge kóleminde qaryzdardy esepten shyǵarý nátijesinde kiris alǵany kórsetilgen.
Qarjylyq kórsetkishter
Qujatqa sáikes, 2024 jyly TsAEK 17,4 mlrd teńge taza tabys tapqan. Alaida toptyń aktivteri 2023 jylǵy 382 mlrd teńgeden 2024 jyly 355 mlrd teńgege azaiǵan. Sonymen qatar, mindettemeler kólemi 130,9 mlrd teńgeden 165,5 mlrd teńgege ósken.
Kommýnaldyq apat pen qylmystyq is
Ekibastuzdaǵy jylý júieleri 2022 jylǵy qarashada bolǵan kommýnaldyq apattan keiin memlekettik menshikke alynǵan. Ol kezde qalada aýa temperatýrasy –30°S bolǵanda, jylýsyz jáne ystyq sýsyz qalǵan. «Ekibastuzjylýenergo» basshylyǵy sottalyp, qyzmettik mindetterin tiisinshe oryndamaǵany úshin kináli dep tanylǵan.
Kompaniia ieleri kimder?
«Ortalyq Aziia Elektroenergetikalyq Korporatsiiasynyń» aktsionerleri — Forbes Kazakhstan tiziminde turǵan milliarderler Aleksandr Klebanov (13-oryn) jáne Sergei Kan (22-oryn), sondai-aq KIF Energy S.A.R.L. jáne «Ortalyq Aziia otyn-energetikalyq kompaniiasy» aktsionerlik qoǵamy.
