Atyraý áýejaıynda Almaty – Atyraý baǵytymen ushqan FlyArystan áýe kompanıasynyń ushaǵy qoný kezinde rýlej jolynan shyǵyp ketti, dep habarlaıdy Dalanews.kz.
Áýe kompanıasynyń málimetinshe, oqıǵa 14 qańtarda bolǵan. FS7202 reısi qonǵannan keıin áýe kemesi turaqqa bet alyp bara jatqan sátte az jyldamdyqpen rýlej jolynan tysqary shyqqan.
Ushaq bortynda 166 jolaýshy bolǵan. Barlyǵy qaýipsiz túrde túsirildi. Jolaýshylar men ekıpaj músheleri arasynda zardap shekkender joq.
FlyArystan ókilderi áýejaı qyzmetterimen jáne avıasıalyq bılik organdarymen birlesip, oqıǵanyń mán-jaıyn anyqtaý úshin tekserý júrgizilip jatqanyn habarlady.
