Almatydaǵy Almaly aýdandyq sot FlyArystan áýe kompaniiasynyń burynǵy qyzmetkerlerine qatysty qylmystyq is boiynsha úkim shyǵardy, dep habarlaidy Dalanews.kz.
Sot Daýr Erkenuly, Erkin Isanov jáne Renat Abýlhanovty «asa iri mólsherde urlyq jasaý» jáne «qylmystyq jolmen alynǵan aqshany zańdastyrý» baptary boiynsha kináli dep tanydy.
Úkimge sáikes, Erkin Isanov pen Renat Abýlhanov 8 jyl 6 aiǵa bas bostandyǵynan aiyryldy. Olarǵa qylmystyq jolmen alynǵan múlikti tárkileý jáne bes jyl merzimge kommertsiialyq uiymdarda basshylyq qyzmet atqarýǵa tyiym salý jazasy taǵaiyndaldy.
Daýr Erkenuly 9 jylǵa sottaldy. Oǵan da múlikti tárkileý jáne bes jylǵa basqarýshy laýazymdardy atqarýǵa tyiym salý qarastyrylǵan.
Barlyq sottalǵandar jazasyn ortasha qaýipsizdik deńgeiindegi mekemelerde óteidi. Jaza merzimi úkim zańdy kúshine engen kúnnen bastap esepteledi.
Sot qaýlysynda Daýr Erkenuly men onyń týystarynyń atyna tirkelgen múlikterdi tárkileý kózdelgen. Olardyń qatarynda Toyota Land Cruiser 200, Toyota Camry, Mercedes-AMG jáne Zikr markaly kólikter bar.
Úkim ázirge zańdy kúshine engen joq jáne apelliatsiialyq tártippen shaǵymdanýǵa jatady.
Sot protsesi barysynda aiyptalýshylar men olardyń qorǵaýshylary taǵylǵan aiyptarmen kelispeitinin birneshe ret málimdedi. Qorǵaý tarapy keltirilgen zalal naqty urlanǵan qarajat emes, aviakompaniianyń ishki derekterine negizdelgen eseptik kórsetkish ekenin alǵa tartty. Sondai-aq is boiynsha birde-bir jolaýshy jábirlenýshi retinde tanylmaǵany jáne aiyptalýshylarǵa tikelei aqsha berilgeni dáleldenbegeni aityldy.
Bul ýájder sot jaryssózinde jariia etilip, istiń materialdaryna qosa tirkeldi.
