الماتىداعى المالى اۋداندىق سوت FlyArystan اۋە كومپانياسىنىڭ بۇرىنعى قىزمەتكەرلەرىنە قاتىستى قىلمىستىق ءىس بويىنشا ۇكىم شىعاردى، دەپ حابارلايدى Dalanews.kz.
سوت داۋر ەركەن ۇلى، ەركىن يسانوۆ جانە رەنات ابۋلحانوۆتى «اسا ءىرى مولشەردە ۇرلىق جاساۋ» جانە «قىلمىستىق جولمەن الىنعان اقشانى زاڭداستىرۋ» باپتارى بويىنشا كىنالى دەپ تانىدى.
ۇكىمگە سايكەس، ەركىن يسانوۆ پەن رەنات ابۋلحانوۆ 8 جىل 6 ايعا باس بوستاندىعىنان ايىرىلدى. ولارعا قىلمىستىق جولمەن الىنعان مۇلىكتى تاركىلەۋ جانە بەس جىل مەرزىمگە كوممەرسيالىق ۇيىمداردا باسشىلىق قىزمەت اتقارۋعا تىيىم سالۋ جازاسى تاعايىندالدى.
داۋر ەركەن ۇلى 9 جىلعا سوتتالدى. وعان دا مۇلىكتى تاركىلەۋ جانە بەس جىلعا باسقارۋشى لاۋازىمداردى اتقارۋعا تىيىم سالۋ قاراستىرىلعان.
بارلىق سوتتالعاندار جازاسىن ورتاشا قاۋىپسىزدىك دەڭگەيىندەگى مەكەمەلەردە وتەيدى. جازا مەرزىمى ۇكىم زاڭدى كۇشىنە ەنگەن كۇننەن باستاپ ەسەپتەلەدى.
سوت قاۋلىسىندا داۋر ەركەن ۇلى مەن ونىڭ تۋىستارىنىڭ اتىنا تىركەلگەن مۇلىكتەردى تاركىلەۋ كوزدەلگەن. ولاردىڭ قاتارىندا Toyota Land Cruiser 200، Toyota Camry، Mercedes-AMG جانە Zikr ماركالى كولىكتەر بار.
ۇكىم ازىرگە زاڭدى كۇشىنە ەنگەن جوق جانە اپەللياسيالىق تارتىپپەن شاعىمدانۋعا جاتادى.
سوت پروسەسى بارىسىندا ايىپتالۋشىلار مەن ولاردىڭ قورعاۋشىلارى تاعىلعان ايىپتارمەن كەلىسپەيتىنىن بىرنەشە رەت مالىمدەدى. قورعاۋ تاراپى كەلتىرىلگەن زالال ناقتى ۇرلانعان قاراجات ەمەس، اۆياكومپانيانىڭ ىشكى دەرەكتەرىنە نەگىزدەلگەن ەسەپتىك كورسەتكىش ەكەنىن العا تارتتى. سونداي-اق ءىس بويىنشا بىردە-بىر جولاۋشى جابىرلەنۋشى رەتىندە تانىلماعانى جانە ايىپتالۋشىلارعا تىكەلەي اقشا بەرىلگەنى دالەلدەنبەگەنى ايتىلدى.
بۇل ۋاجدەر سوت جارىسسوزىندە جاريا ەتىلىپ، ءىستىڭ ماتەريالدارىنا قوسا تىركەلدى.
