Qazaqstannyń Kásibi boks federatsiiasy Jánibek Álimhanulyna qatysty jaǵdai boiynsha resmi málimdeme jasady, dep habarlaidy Dalanews.kz.
Federatsiia ókilderiniń aitýynsha, sportshy isi aiasynda V synamasyn ashý zańdyq turǵydan sheshýshi kezeń bolyp sanalady. Bul tek boksshynyń mansabyna ǵana emes, iske qatysy bar barlyq taraptyń áreketterine quqyqtyq baǵa berýge tikelei áser etedi.
Málimdemede Qazaqstannyń Kásibi boks federatsiiasy halyqaralyq sport quqyǵynyń negizgi qaǵidattaryn, atap aitqanda kinásizdik prezýmptsiiasyn, protsestik adaldyqty jáne reglamentterdiń qatań saqtalýyn ustanatyny atap ótilgen.
Federatsiia V synamasynyń resmi nátijeleri jariialanǵanǵa deiin Jánibek Álimhanuly zańdy túrde kinásiz dep sanalatynyn eske saldy. Osyǵan bailanysty aiyptaýshy sipattaǵy kez kelgen jariia málimdemeler protsestiń ádildigine qysym kórsetý jáne sportshynyń quqyqtaryn buzý retinde baǵalanatyny aityldy.
Sondai-aq V synamasyn ashý men taldaý bekitilgen rásimderge tolyq sáikes júrgizilýi, al sportshy men onyń ókilderi protsestiń barlyq kezeńderi men nátijelerine qol jetkizýi tiis ekeni talap etiledi. Reglamentten kez kelgen aýytqý nátijelerdi jaramsyz dep tanýǵa negiz bolýy múmkin.
Federatsiia Jánibek Álimhanulyn tirkelgen kásibi boksshy retinde qorǵaýdy jalǵastyratynyn jáne onyń quqyqtary men bedelin qorǵaý úshin barlyq zańdy tetikterdi qoldanatynyn málimdedi. Eger V synamasy taza dep tanylsa, barlyq aiyptaýlardy resmi túrde alyp tastaý, sportshynyń bedelin jariia túrde qalpyna keltirý jáne is barysynda jasalǵan áreketterge quqyqtyq baǵa berý talap etiledi.
Al eger buzýshylyqtar zańdy ári dáleldi túrde anyqtalsa, federatsiia sheshimderdi qoldanystaǵy reglamentter aiasynda qabyldaitynyn habarlady.
Málimdeme sońynda federatsiia ókilderi basty qaǵida emotsiia emes, quqyq ekenin atap ótip, tek zańǵa sai alynǵan V synamasynyń nátijesi ǵana túpkilikti qorytyndy jasaýǵa negiz bolatynyn jetkizdi.
