Memleket basshysy Qasym-Jomart Kemeluly Toqaev ekonomikalyq jáne áleýmettik damýdyń negizgi basymdyǵy retinde ýniversitet ǵylymyn jáne infraqurylymyn damytý mańyzdylyǵyn únemi nazarda ustap keledi. Osyǵan sáikes, Ál-Farabi atyndaǵy Qazaq ulttyq ýniversitetinde «Farabi Hub» innovatsiialyq ónimder men joǵary tehnologiialyq jobalar ortalyǵy boi kóterdi, dep habarlaidy Dalanews.kz
QazUÝ-dyń 90 jyldyq mereitoiy aiasynda ashylǵan habtyń maqsaty – ozyq bilimge, tehnologiialar men resýrstarǵa qol jetkizýdi qamtamasyz ete otyryp, ǵylymi ázirlemeler men tehnologiialyq ideialardy naqty ekonomikaǵa engizýdi jedeldetý.
Bul týraly Ál-Farabi atyndaǵy QazUÝ Basqarma Tóraǵasy-Rektory Janseiit Túimebaev Ál-Farabi atyndaǵy Qazaq ulttyq ýniversitetinde Almaty qalasynyń ákimdigimen birlesip uiymdastyrylǵan «Ǵylym, biznes jáne óndiris yqpaldastyǵy» atty forýmda arnaiy toqtaldy.
– «Farabi Hub» ýniversitettermen jáne ǵylymi institýttarmen, sondai-aq investor kompaniialarmen áriptestik bailanys ornatady. Birlesken zertteýler júrgizilip, jańa tehnologiialar ázirlenedi. Sońǵy úlgidegi qurylǵylarmen jabdyqtalǵan ǵylymi zerthanalar ǵylym men tehnologiianyń ártúrli salalarynda zertteýler júrgizip, tájiribe jasaýǵa múmkindik beredi, – dedi oqý ornynyń basshysy.
Munda ZTE, «ZooStan» Ortalyq Aziiany zertteý jónindegi halyqaralyq ǵylymi-zertteý ortalyǵy, Soltústik-batys politehnikalyq ýniversitetimen birlesken mikrospýtnikter zerthanasy, Biologiia jáne biotehnologiia zerthanasy, Himiia jáne himiialyq tehnologiia zerthanasy, Zamanaýi qoldanbaly fizika jáne joǵary tehnologiialar zerthanasy, «Robototehnika jáne mehatronika RoboMech» ǵylymi-bilim berý ortalyǵy, Dárilik ósimdikterdi ǵylymi-zertteý ortalyǵy, Sot saraptamalary ortalyǵy, Ǵylymi-tehnologiialyq park ornalasqan.
«Farabi Hub» ortalyǵynyń jalpy aýdany 5000 sharshy metrdi quraidy.
