Májilis depýtaty Ermurat Bapi eski júiemen kúres áli jalǵasyp jatqanyn aitty, - dep habarlaidy Dalanews.kz.
Depýtat ózgerister nátijesinde Qazaqstan Parlamentiniń Májilisinde majoritarlyq mandatpen kelgen depýtattardyń bir shoǵyry paida bolǵanyn da aitty.
"Qoǵam men memlekettik bilik arasyna dáneker kópir salýǵa áreket qylyp júrgen bul depýtattardyń dármendi daýysy barǵan saiyn batyl shyǵa bastaǵanyn qulaǵynda «saiasi múkisi» joq qaýym estip otyrǵany aidan anyq. "Kibirtik» demekshi, Qazaqstannyń jańa tarihynda «reformalar kezeńi» degen tańbamen qalatyn dáýirdiń barysynda túrli sebepterge bailanysty kidirister baryn da joqqa shyǵarýǵa bolmaidy. Eldegi 30 jyldyq siresken avtoritarlyq súri muranyń «murnyn buzyp», qyr arqasyn qiratý jańa bilikke de ońaiǵa túsip jatpaǵanyn irgeden sezinip júrmiz", - dedi depýtat.
Onyń sózinshe, eski Qazaqstannyń álegi áli bitpegen.
"Eskilerdiń eregesken qarsylyǵy Qańtardan keiin de damyl tapty dei almaimyz. Qazynalyq-biýdjettik astaýdan qaǵylǵan, halyqtyq muraǵa murtyn batyrý daǵdysyna qaityp oralýdy ańsaǵan olardyń astyrtyn aiqasy áli de jalǵasyp jatyr. Búginde olar protestik piǵyldaǵy qaýymdastyqty óz qataryna qaratýdyń jantalasqan qamyn jasaýda. Áleýmettik jelilerde jalaýlatyp júrgen jekelegen qoǵamdyq pikir serkeleriniń «Jańa Qazaqstanǵa» qarai atqan tasy «eskilerdiń» esesin kúitteitine kýá bolyp júrmiz.
Jeke dara bilikke tabyný derti ón baiyna sińip ketken memlekettik-biýrokratiialyq apparatty da sozylmaly avtokratiialyq dertten aiyqtyrý ońai bolmai turǵanyna osy ortaǵa kelgen meniń kózim ábden jetti. Bul derttiń dármeni apparattyq vertikaldy dendep alǵanyn depýtattyq saýaldary men qoǵamdyq múdde turǵysyndaǵy azamattyq talaptaryna tiisti jaýap ala almai júrgen áriptesterimniń de kózi jetti dep bilemin
«Protestik qaýym» degende eń aldymen kez-kelgen ózgeris ózdiginen kelmeitinin, reformanyń ońailyqpen jasalmaitynyn, ókiletti biliktiń bir pushpaǵynda júrgen meniń pikirim arqyly, qoǵam da túisinýge tyryssa dep oilaimyn. Birinshi kezekte reformanyń jedel júrýine memlekettik organdardyń apparattary ǵana emes, eski rejimniń qyspaǵynda qalyp, demokratiialyq damý formatsiiasy kendelep qalǵan qoǵamnyń ózi de daiyn bolmaǵany jasyryn emes", - dedi ol.
Depýtat bilik pen qoǵam ortaq til tabyspaiynsha, «Jańa Qazaqstan» ideiasyn tolyqqandy júzege asyrý múmkin emes ekenin málimdedi.
"Eldegi ózgeristerdi qoǵamnyń tikelei qatysynsyz bilik jeke dara jasai almaidy. Ózgerister ulttyq, eldik, memlekettik ideiaǵa ainalýy úshin jarqyn ómirge bastaityn ortaq múdde jolynda qos taraptyń mámileli túiisý núkteleriniń bolǵany aýadai qajet!" - dedi ol.
