Qarjylyq monitoring agenttigi tóraǵasynyń orynbasary Jeńis Elemesov BAÁ-de qazaqstandyq elita ókilderiniń qymbat múlikteriniń shyǵý tegin tekserý máselesi qandai jaǵdaida qolǵa alynatynyn aitty, dep habarlaidy Dalanews.kz.
Astanada ótken ǵylymi konferentsiiada jýrnalisterdiń saýaldaryna jaýap bergen Jeńis Elemesov atalǵan múlikterdiń zańsyz jolmen alynǵany týraly quzyrly organdar resmi qorytyndy berse, agenttik bul isti qolǵa alýǵa daiyn ekenin jetkizdi.
"Iá, árine, biz bul máselege qyzyǵýshylyq tanytamyz. Eger osy aktivterdiń qylmystyq jolmen alynǵany týraly naqty derekterińiz bolsa, bizge usynýǵa bolady. Alaida biz qandai da bir tekseris júrgizetin organ emespiz. Bul – arnaiy ýákiletti organdardyń quzyryndaǵy is. Olar tekseris júrgizip, tiisti qorytyndy nemese aktiler ázirleidi, keiin bul qujattardy quqyq qorǵaý organdaryna joldaidy.
Eger bizge osyndai qorytyndy nemese aktiler kelip tússe, biz mindetti túrde quqyqtyq baǵa berip, protsessýaldyq sheshim qabyldaimyz", – dedi ol.
Jeńis Elemesovtiń aitýynsha, ekinshi bir jol – qarjylyq monitoring sýbektileri arqyly jumys isteý. Onyń sózinshe, kún saiyn júrgiziletin barlyq tranzaktsiialar baqylaýda, eger olar shekti somadan asyp ketse nemese kúmándi sipatqa ie bolsa, bul aqparat agenttikke beriledi. Agenttik osy málimetterdi tereń taldaýdan ótkizedi.
Eske salaiyq, buǵan deiin jýrnalister #DubaiUnlocked jahandyq zertteýiniń nátijelerin jariialaǵan bolatyn. Onda Qazaqstannyń birqatar burynǵy sheneýnikteri men joǵary laýazymdy tulǵalary Dýbaida qymbat jyljymaityn múlikke ie ekeni kórsetilgen. Keibir páterler olardyń balalarynyń atyna tirkelgen.
Atalǵan zertteýde Nursultan Nazarbaevtyń ekinshi áieli Asel Qurmanbaeva, Qairat Satybaldy, burynǵy ishki ister ministri Erlan Turǵymbaevtyń uly, burynǵy premer-ministr Serik Ahmetovtiń uly jáne taǵy basqa tulǵalar atalǵan.
