قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ باا-دە قازاقستاندىق ەليتا وكىلدەرىنىڭ قىمبات مۇلىكتەرىنىڭ شىعۋ تەگىن تەكسەرۋ ماسەلەسى قانداي جاعدايدا قولعا الىناتىنىن ايتتى، دەپ حابارلايدى Dalanews.kz.
استانادا وتكەن عىلىمي كونفەرەنسيادا جۋرناليستەردىڭ ساۋالدارىنا جاۋاپ بەرگەن جەڭىس ەلەمەسوۆ اتالعان مۇلىكتەردىڭ زاڭسىز جولمەن الىنعانى تۋرالى قۇزىرلى ورگاندار رەسمي قورىتىندى بەرسە، اگەنتتىك بۇل ءىستى قولعا الۋعا دايىن ەكەنىن جەتكىزدى.
"ءيا، ارينە، ءبىز بۇل ماسەلەگە قىزىعۋشىلىق تانىتامىز. ەگەر وسى اكتيۆتەردىڭ قىلمىستىق جولمەن الىنعانى تۋرالى ناقتى دەرەكتەرىڭىز بولسا، بىزگە ۇسىنۋعا بولادى. الايدا ءبىز قانداي دا ءبىر تەكسەرىس جۇرگىزەتىن ورگان ەمەسپىز. بۇل – ارنايى ۋاكىلەتتى ورگانداردىڭ قۇزىرىنداعى ءىس. ولار تەكسەرىس جۇرگىزىپ، ءتيىستى قورىتىندى نەمەسە اكتىلەر ازىرلەيدى، كەيىن بۇل قۇجاتتاردى قۇقىق قورعاۋ ورگاندارىنا جولدايدى.
ەگەر بىزگە وسىنداي قورىتىندى نەمەسە اكتىلەر كەلىپ تۇسسە، ءبىز مىندەتتى تۇردە قۇقىقتىق باعا بەرىپ، پروسەسسۋالدىق شەشىم قابىلدايمىز"، – دەدى ول.
جەڭىس ەلەمەسوۆتىڭ ايتۋىنشا، ەكىنشى ءبىر جول – قارجىلىق مونيتورينگ سۋبەكتىلەرى ارقىلى جۇمىس ىستەۋ. ونىڭ سوزىنشە، كۇن سايىن جۇرگىزىلەتىن بارلىق ترانزاكسيالار باقىلاۋدا، ەگەر ولار شەكتى سومادان اسىپ كەتسە نەمەسە كۇماندى سيپاتقا يە بولسا، بۇل اقپارات اگەنتتىككە بەرىلەدى. اگەنتتىك وسى مالىمەتتەردى تەرەڭ تالداۋدان وتكىزەدى.
ەسكە سالايىق، بۇعان دەيىن جۋرناليستەر #DubaiUnlocked جاھاندىق زەرتتەۋىنىڭ ناتيجەلەرىن جاريالاعان بولاتىن. وندا قازاقستاننىڭ ءبىرقاتار بۇرىنعى شەنەۋنىكتەرى مەن جوعارى لاۋازىمدى تۇلعالارى دۋبايدا قىمبات جىلجىمايتىن مۇلىككە يە ەكەنى كورسەتىلگەن. كەيبىر پاتەرلەر ولاردىڭ بالالارىنىڭ اتىنا تىركەلگەن.
اتالعان زەرتتەۋدە نۇرسۇلتان نازاربايەۆتىڭ ەكىنشى ايەلى اسەل قۇرمانبايەۆا، قايرات ساتىبالدى، بۇرىنعى ىشكى ىستەر ءمينيسترى ەرلان تۇرعىمبايەۆتىڭ ۇلى، بۇرىنعى پرەمەر-مينيستر سەرىك احمەتوۆتىڭ ۇلى جانە تاعى باسقا تۇلعالار اتالعان.
