Májilis depýtaty Erlan Saırovtyń aıtýynsha, Qazaqstanda kóleńkeli ekonomıkanyń kólemi búginde 42 mıllıard dollarǵa jetken. Onyń 15 mıllıard dollary krıptovalúta arqyly shetelge shyǵarylǵan. Depýtat mundaı aqshanyń bolashaqta eldegi turaqtylyqqa qaýip tóndiretin quralǵa aınalýy yqtımal ekenin eskertti, dep habarlaıdy Dalanews.kz.
Saırov keltirgen derekterge súıensek, kóleńkeli ekonomıkanyń bul kólemi sońǵy úsh jylda ózgermegen. Alaıda búgingi kúni krıptovalúta arqyly elden ketken 15 mıllıard dollar anyqtalyp otyr. Memlekettik organdar mundaı kólemdegi qarajat qozǵalysyn baqylaı almaı otyrǵanyn aıtqan depýtat elden qansha aqsha shyqqanyn eshkim dóp basyp aıta almaıtynyn jetkizdi. Onyń pikirinshe, elimizde sońǵy 30 jylda shetelge zańsyz shyǵarylǵan aktıvterge keshendi aýdıt júrgizý qajet.
"Biz memlekettiń búdjetin tıynnan qurastyryp otyrmyz. Al elde 42 mıllıard dollar kólemindegi kóleńkeli ekonomıka bar. Oǵan qosymsha krıptovalútamen 15 mıllıard dollar ketken. Budan bólek, sheteldik aqparat kózderi 150-200 mıllıard dollardyń zańsyz shyǵarylǵany týraly málimet taratty. Mine, búdjetti tolyqtyratyn negizgi rezerv osynda jatyr", – dedi depýtat.
Saırovtyń aıtýynsha, bul qarjy izdeýdi quzyrly organdar júıeli jáne maqsatty túrde qolǵa alýy tıis. Eger mundaı qadam jasalmasa, shetelge ketken qarjy elge qaıta oralyp, destrýktıvti kúshterdiń qolyna ótip ketýi múmkin.
"150 mıllıard dollar erteń el ishin iritki salý úshin qaıta kelýi ábden múmkin. Óıtkeni biz el ishinde ýaqytyn kútip otyrǵan revanshıserdiń bar ekenin jaqsy bilemiz", – dedi Erlan Saırov.
Májilis kýlýarynda ol Qazaqstan ishindegi zańsyz aktıvterdiń 2 trıllıon teńgesi qaıtarylǵanyn, al shetelge ketken qarjyny elge qaıtarý áldeqaıda kúrdeli másele ekenin de atap ótti.
