Májilis depýtaty Erlan Sairovtyń aitýynsha, Qazaqstanda kóleńkeli ekonomikanyń kólemi búginde 42 milliard dollarǵa jetken. Onyń 15 milliard dollary kriptovaliýta arqyly shetelge shyǵarylǵan. Depýtat mundai aqshanyń bolashaqta eldegi turaqtylyqqa qaýip tóndiretin quralǵa ainalýy yqtimal ekenin eskertti, dep habarlaidy Dalanews.kz.
Sairov keltirgen derekterge súiensek, kóleńkeli ekonomikanyń bul kólemi sońǵy úsh jylda ózgermegen. Alaida búgingi kúni kriptovaliýta arqyly elden ketken 15 milliard dollar anyqtalyp otyr. Memlekettik organdar mundai kólemdegi qarajat qozǵalysyn baqylai almai otyrǵanyn aitqan depýtat elden qansha aqsha shyqqanyn eshkim dóp basyp aita almaitynyn jetkizdi. Onyń pikirinshe, elimizde sońǵy 30 jylda shetelge zańsyz shyǵarylǵan aktivterge keshendi aýdit júrgizý qajet.
"Biz memlekettiń biýdjetin tiynnan qurastyryp otyrmyz. Al elde 42 milliard dollar kólemindegi kóleńkeli ekonomika bar. Oǵan qosymsha kriptovaliýtamen 15 milliard dollar ketken. Budan bólek, sheteldik aqparat kózderi 150-200 milliard dollardyń zańsyz shyǵarylǵany týraly málimet taratty. Mine, biýdjetti tolyqtyratyn negizgi rezerv osynda jatyr", – dedi depýtat.
Sairovtyń aitýynsha, bul qarjy izdeýdi quzyrly organdar júieli jáne maqsatty túrde qolǵa alýy tiis. Eger mundai qadam jasalmasa, shetelge ketken qarjy elge qaita oralyp, destrýktivti kúshterdiń qolyna ótip ketýi múmkin.
"150 milliard dollar erteń el ishin iritki salý úshin qaita kelýi ábden múmkin. Óitkeni biz el ishinde ýaqytyn kútip otyrǵan revanshisterdiń bar ekenin jaqsy bilemiz", – dedi Erlan Sairov.
Májilis kýlýarynda ol Qazaqstan ishindegi zańsyz aktivterdiń 2 trillion teńgesi qaitarylǵanyn, al shetelge ketken qarjyny elge qaitarý áldeqaida kúrdeli másele ekenin de atap ótti.
