Al, jábirlenýshiniń jazǵan aryzyn jaýapty organdar eskerýsiz qaldyrǵan. Almaty turǵyny quqyq qorǵaý organdarynyń zańdy belshesinen basyp otyrǵanyn aitady.
Redaktsiiamyzǵa Tazagúldiń inisi Almaz esimdi azamat habarlasyp, bolǵan jaitty tolyqtai baiandap berdi.
***
«Oqiǵa 2021 jyly 10 qazanda boldy. Tańerteńgi ýaqytta ápkemdi jaiaý júrginshiler jolaǵynan ótip bara jatqan jerinen jeńil kólik qaǵyp ketti. Ápkem 8 metr jerge ushyp túsken. Qatty soqqydan sol jaq iyǵy, omyrtqasy, jambasy, baltyr súiegi syndy. Segiz ai boiy tósekten tura almai jatty. Qazir ekinshi toptaǵy múgedek. Túnde uiqydan, kúndiz kúlkiden aiyryldy. Janyna tek aýrýdy basatyn dári ǵana járdem beredi», - deidi Almaz.
Tazagúl Jámeshovany qaqqan kólik ishinde eki er adam bolǵan. Kólik oqiǵasy bolǵan kezde júrgizýshiniń janynda otyrǵan jigit syrtqa shyǵyp, qatty soqqydan jol shetine ushyp túsken áieldiń basyn kóterip: «Táte, biz sizdi qaǵyp kettik», - degen. Oqiǵa ornyna jedel-járdem kelip, Tazagúldi tez arada Talǵar aýdanynyń aýrýhanasyna jetkizedi.
«Men ápkemdi qaǵyp ketken kezde, dereý sol jerge bardym. Kólik júrgizýshisi keshirim surap, barlyq jaýapkershilikti óz moinyna alatynyn, ápkemniń emine kómektesetin aitty. Basqa túskenge kónesiń, adamgershilikke salyp, aryz jazbai-aq, qoiaiyn dedim. Biraq, júrgizýshiniń adamshylyǵy bolmai shyqty. Ápkemniń em-domyna kómektespek túgili, qalyn suraýǵa jaraǵan joq», - deidi Almaz.
Almaz bir kúnnen keiin Talǵar aýdany politsiiasyna aryz túsiredi. Politsiia «bári zertteledi» dep, aryzdy alyp qalady.
«Aryz jazǵannan keiin politsiiaǵa habarlasyp turdyq. Olar is qaralyp jatqanyn aityp júrdi. Osy kezde ápkemdi qaqqan kólik júrgizýshisi bizge: «Jazǵan aryzyńdy qaitaryp al, áitpese ózińe jaman bolady», - dep qoqan-loqy kórsete bastady. Meniń ekinshi ápkemniń jumysyna 5-6 er adam baryp qorqytyp ketken. Úsh ai ótkennen keiin politsiiaǵa barǵanymyzda, istiń baiaǵyda jabylyp qalǵanyn aitty. Biz ań-tań boldyq. Jaýapty organ bizge tipti, bul týraly eskertken de joq», - deidi jábirlenýshiniń inisi Almaz.
Almaz taǵy da aryz jazady. Advokat jaldaidy. Biraq, sotqa deiingi tergep-tekserý organdary áli kúnge deiin isti sozyp, sotqa jibermei otyr.
«Talǵar aýdany politsiia tergeýshisi kólik júrgizýshiniń «meniń kinám joq» degen sózin ǵana aiǵaq etip otyr. Onyń jaiaý júrginshiler jolyna jaqyndaǵanda saǵatyna 60 km júrýi tiis ekenine, baǵdarshamdy elemegenine nazar aýdaryp otyrǵan joq. Eń soraqysy, politsiia meniń ápkemdi jaiaý júrginshiler jolaǵynan emes, odan 30 metr qashyqtyqta, ótýge bolmaityn jerden ótken, kóliktiń astyna ózi túsken etip qorytyndy shyǵaryp otyr. Ápkemdi qaǵyp ketken kezde, onyń basyn ustap jylaǵan er bala júrgizýshiniń baldyzy. Maǵan ony júrgizýshiniń áieli óz aýzymen aitqan bolatyn. Biraq, politsiia ol jigittiń ornyna kýágerdi almastyryp, jazyqty taraptyń paidasyna sheship otyr. Odan qala bere, oqiǵa ornyna jetken jedel-járdemnen eshqandai túsinikteme almaǵan. Al, kólik oqiǵasy bolǵan jerdiń kartasy tek júrgizýshiniń aitqanymen syzyldy.
Júrgizýshi ápkemdi qaǵyp ketkennen keiin ekinshi kúni-aq, quqyq qorǵaý organdary tarapynan «arestke» alynǵan kóligin jóndeýden ótkizip, emin-erkin minip aldy. Bul zańsyzdyqtyń qalai iske asqanyna tergeýshi jaýap bergen joq. Tek júrgizýshiniń jaǵyna shyǵyp, bizdiń aryz-shaǵymymyzdy qulaǵyna ilmedi», - deidi zańnan ádildik izdegen Almaz.
Almazdyń aitýynsha, Tazagúl Jámeshovany qaǵyp ketken kólik júrgizýshisiniń zań organdarynda isteitin «týysy» bar kórinedi.
Quqyq qorǵaý organdarynyń isti sonsha sozbalaqtaǵanyna qaraǵanda, «týystyqtyń» bir sebi tiip turǵanyna kúmán qalmaidy.
«Isti ashýdan góri «jaýyp tastaýǵa» qumar quqyq qorǵaýshy organdardy kórgende, kókeige «Ádiletti Qazaqstanǵa jetý úshin áli qansha jyldy sarp etemiz?» degen suraq keledi», - deidi arasha izdegen Almaz myrza.
Dalanews.kz
