Oqiǵa ótken jeksenbi kúni bolǵan. Mitsubishi markaly jol talǵamaityn kólik mingen 35 jastaǵy júrgizýshi balany basyp ketti. Noks.kz basylymyna suhbat bergen Nikitanyń ákesi oqiǵanyń mán-jaiyn aityp berdi.
– Sol kúni saǵat 12 kezinde ulyma qoqys tógip kelýge jumsadym. Al qoqysty laqtyrý úshin joldyń arǵy jaǵyna ótýdiń qajeti de joq. Sebebi konteiner dál úidiń janynda ornalasqan. Balam dál sol konteinerler alańynda turǵanda ony djip soqqan, – deidi ol.
Soqqynyń qatty bolǵany sonsha, temir jáne beton tosqaýyl qirap qalǵan. Al konteiner birneshe metrge ushyp ketken. Kýágerler balany kúl-qoqystyń arasynan shyǵaryp alypty. Balanyń telefonyn qoldy qylǵan adamdar da bolǵan. Artynan smartofonmen bailanys úzildi. Bireýler ony sóndirip tastapty. «On minýttan keiin Nikita kelmegen soń men onyń mobildi telefonyna qońyraý shaldym. Qońyraý baryp turǵan. Biraq eshkim almady. Ulym balalarmen oinap ketti dep oiladym da, qoia saldym. Artynan úige politseiler keldi. Olar ulymnyń qaltasyndaǵy kiltke qarap, úidiń nómirin anyqtapty» deidi Nikitanyń ákesi.
Qalalyq aýrýhanada oǵan «bas súiek-mi zaqym» degen diagnoz qoidy. Sol kúni Ridderge oblys ortalyǵynan neirohirýrgtar kelgen. Olar balanyń ómirine qaýip tónip turǵanyn aitty. Sebebi miy isip ketipti.
Óskemen qalasyndaǵy arnaiy bólimge de ázirshe tasymaldaýǵa bolmaidy. Qazir oqýshy bala es-tússiz jatyr. Ol jasandy jeldetý apparatyna qosylǵan. Al tamaqty zond arqyly berip otyrady. Kólik júrgizýshisine qatysty Qylmystyq kodekstiń 345-baby, 2-tarmaǵy (Kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy, abaisyzda adamnyń densaýlyǵyna aýyr ziian keltirýge ákep soqqan is-áreket) boiynsha sotqa deiingi tergeý bastaldy.
