QR Parlamenti Májilisiniń depýtaty Ermurat Bapi Qazaqstanda «qos bilik» bar degen qaýesetterdi joqqa shyǵardy. Depýtattyń aitýynsha, «elde Nazarbaev sahna syrtynan bárin basqaryp otyr» degen alyp-qashpa sózder tek qoǵamǵa iritki salýǵa arnalǵan.
«Onyń astarynda fakti de, zańdyq negiz de joq. Tek elge iritki salýdy kózdeitin teris piǵyl ǵana bar. Tipti osy teris pikirdi eski, súri júieniń jaqtastary taratyp júrýi de ǵajap emes», – deidi Ermurat Bapi.
Depýtat 2022 jyldyń maýsym aiynan beri Nursultan Nazarbaevtyń saiasi qyzmeti de, laýazymy da, resmi mártebesi de toqtap, ol memlekettik sheshimderge qatysa almaitynyn atap ótti. Onyń týystary da bilikten tolyq shettetilip, keibiri dúnie-múlkinen aiyrylyp, shetel asýǵa májbúr bolǵan.
«Toqeterin aitqanda, memlekettik apparat tutastai, onyń ishinde eldiń qarýly kúshteri túgel – qazirgi memleket basshysynyń, Úkimettiń jáne basqa da tiisti resmi memlekettik organdardyń qolynda», – dep atap ótti Májilis depýtaty.
Ermurat Bapi sondai-aq, eks-prezidenttiń Reseige jasaǵan saparyna qatysty da pikir bildirip, ony ádettegi halyqaralyq tájiribege jatqyzdy. Germaniia, AQSh, Frantsiia, Ulybritaniia siiaqty elderdiń burynǵy kóshbasshylary da ózge memleketterdiń basshylarymen kezdesip, forýmdarǵa qatysyp júr.
«Óz biligi ózinde, kemeline kelgen ozyq elder siiaqty jekelegen azamattardyń tarihi roli men onyń memlekettik isterge shyn mánisindegi yqpal-bedelin ajyratyp úirenýimiz kerek-aq. Munsyz óz oiymyzdaǵy qorqynyshtarmen alysyp qana qoimai, olardy memlekettik júiege tańyp, jańyla beremiz», - deidi ol.
