Búgin ShQO ákimi Ermek Kósherbaev jumys saparymen Marqakól aýdanyna baryp, eń shalǵai ári shekaralas ornalasqan Shanaǵatty aýylynda boldy. Bir aita keterligi, buǵan deiin munda birde-bir oblys ákimi nemese basqarma basshysy bolmaǵan, – dep habarlaidy Dalanews.kz.
Ermek Kósherbaev aýyl turǵyndarymen kezdesip, ózekti taqyryptardy talqylady.
Eń aldymen sýmen, internetpen qamtamasyz etý jáne joldardy jóndeý máseleleri qozǵaldy. Oblys basshysy sý máselesin jazdyń ortasyna deiin sheshýdi tapsyrdy. Qujattardy daiyndaýǵa eki aiǵa jýyq ýaqyt kerek.
Al jol máselesine kelsek, Marqakól men Shanaǵatty arasyndaǵy 25 shaqyrym tasjoldy jóndeýge 300 million bólý qajet. Bul máseleni jolaýshylar kóligi jáne avtomobil joldary, ekonomika jáne biýdjettik josparlaý basqarmalary qarastyrady.
Sonymen qatar oblys ákimi aýylǵa meditsinalyq pýnkt salýdy tapsyrdy. Al turǵyndar jedel járdem kóligin satyp alý kerektigin jetkizdi. Aimaq basshysynyń aitýynsha, búginde aýyldy damytý úshin turǵyndarǵa jer telimderin berý qajet. Biyl Marqakól aýdanynda 12 myń gektar jerdi memleket menshigine qaitarý josparlanyp otyr. Turǵyndarǵa jerdi igerýge arnalǵan damý perspektivalary men júzege asyrýǵa bolatyn jobalardy túsindirý qajet. Jumys kúshi tapshy aýmaqqa ońtústikten qonys aýdarýshylardy ákelýge bolady.
Aimaq basshysy halyqtyń basqa eldi mekenge kóshýine jol bermeý maqsatynda Shanaǵatty aýylynda azamattardyń bos ýaqytyn tiimdi ótkizý úshin komiýniti ortalyǵyn qurýdy tapsyrdy.
