Memlekettik keńesshi Erlan Qarin Prezident joldaýyna qatysty pikir bildirdi, dep habarlaidy Dalanews.kz.
Erlan Qarinniń sózinshe, biylǵy joldaýdyń biriktirýshi ideiasy – tsifrlandyrýdy keń kólemde damytý jáne jasandy intellektini jappai engizý.
"Prezident Qasym-Jomart Toqaev ekonomikanyń túrli salalaryna tsifrlandyrý men jasandy intellekt quraldaryn jedeldetip engizý mindetin júktedi. Bul qadamnyń barlyǵy jinaqtala kelip, Qazaqstannyń jańa Ulttyq tsifrlyq damý strategiiasyna biriktiriledi. Qazaqstan jańa tehnologiialardy damytý men engizýde keshendi ári júieli sheshimder qabyldaǵan álemdegi alǵashqy elderdiń biri bolyp otyr.
Bul rette Qazaqstan bolashaqta tehnologiialyq turǵydan damyǵan memleket atanýdy kózdeidi. Osylaisha, biylǵy Joldaýda tsifrlyq transformatsiia men jasandy intellektini engizý bizdiń el úshin jańa ulttyq ideia retinde aiqyndaldy", - dedi ol.
Memlekettik keńesshi Prezident Qasym-Jomart Toqaevtyń jańa saiasi bastamalarynyń negizgi qyrlaryn atap ótti.
"Usynylǵan parlamenttik reforma prezidenttik saiasattyń "Kúshti Prezident – Yqpaldy Parlament – Esep beretin Úkimet" basty formýlasyn damytady. Referendým ótkizý jónindegi usynys Prezidenttiń el bolashaǵyn aiqyndaityn túiindi máselelerge qatysty tek qana kelise otyryp sheshim qabyldaý qaǵidatynyń ózgermeitinin kórsetti. Prezident osymen birneshe ret aldaǵy saiasi josparlaryn aldyn ala ári ashyq jariialady. 2022-2023 jyldardaǵy reformalar da, AES salý jónindegi referendým da kezinde kúni buryn habarlanǵan bolatyn.
Osy tusta airyqsha atap óterligi, áńgime Konstitýtsiiaǵa jedel túrde ózgerister engizý nemese Parlament sailaýyn jariialaý týraly bolyp otyrǵan joq. Maqsat bul emes. Basty ári negizgi maqsat – saiasi júieniń institýtsionaldyq negizderin odan ári nyǵaitý. Sondyqtan Prezident oilastyrylǵan, birizdilikke negizdelgen dáiekti tásildi quptaidy. Eń aldymen sarapshylar men kópshilik qaýym arasynda jan-jaqty ári tereń talqylaý júrgizý qajet. Osylaisha, Qazaqstan kezekti ret kezeń-kezeńimen jáne jan-jaqty júzege asyrylatyn saiasi jańǵyrýdyń úlgisin kórsetti", - dedi Erlan Qarin.
