Qazaqstan Respýblikasynyń Memlekettik keńesshisi Erlan Qarin Ulttyq kitaphana ǵimaratynda ornalasqan sailaý ýchaskesine kelip, daýys berdi, dep habarlaidy Dalanews.kz.
Memlekettik keńesshi bul kúnniń mańyzyn atap ótip, árbir azamat óz konstitýtsiialyq quqyǵyn paidalanyp, daýys bere alatynyn aitty. Sonymen qatar erte kelýiniń qupiiasyn da bólisti.
"Sailaý ýchaskesine tańnan kelip, daýys berý ádetime ainalǵan. Sonymen qatar, óte yńǵaily. Adamnyń legi az. Odan keiin óz jeke jumystaryńmen de ainalysa berýine ýaqyt bar. Mysaly qazir men dostarymmen kofehanada kezdesemin. Sondyqtan erte kelip daýys berý men úshin dástúr emes, bala kezimnen qalyptasqan ádet”, - dedi Qarin Zakon.kz agenttegine bergen suqbatynda.
Erlan Qarinniń aitýynsha, búgingi referendým elimizdiń bolashaǵyn aiqyndaý turǵysynan óte mańyzdy.
"Men óz tarapymnan referendýmǵa shyǵarylatyn máseleniń ǵana emes, ony ótkizý faktisiniń de mańyzdylyǵyn atap óter edim. Men úshin, saiasi sarapshy retinde, birinshiden, TMD men Ortalyq Aziiada Qazaqstan osyndai másele boiynsha referendým ótkizetin birinshi jáne jalǵyz memleket.Bálkim, TMD-da ǵana emes, keńirek geosaiasi ortamyzda da bolar", — dep óz paiymymen bólisti ol.
Eske sala keteiik, daýys berý tizimine 12,3 millionǵa jýyq qazaqstandyq engizilgen.
Referendýmǵa 30 shet memleket pen tórt halyqaralyq uiymnyń (Táýelsiz Memleketter Dostastyǵy, Shanhai yntymaqtastyq uiymy, Túrki memleketteri uiymy, Aziiadaǵy ózara is-qimyl jáne senim sharalary jónindegi keńes) atynan 177 baiqaýshy qatysady.
Daýys berý barysyn 14 memlekettiń ortalyq sailaý organdarynyń ókilderi, sonyń ishinde Ázirbaijan, Belarýs, Tájikstan jáne Ózbekstan ortalyq sailaý organdarynyń tóraǵalary da baqylap otyr.
Qazaqstan Respýblikasynyń Syrtqy ister ministrligi 37 elden 200 sheteldik jýrnalisterdi akkredittedi, olar da respýblikalyq referendýmdy baqylap, aqparat taratady.
