Qazaqstannyń vitse-prezidenti Erlan Qarin Mańǵystaý oblysyndaǵy qaiǵyly oqiǵaǵa bailanysty qaza tapqan áskeri qyzmetshilerdiń otbasylaryna kóńil aityp, halyqty sabyr men birlikke shaqyrdy, dep habarlaidy dalanews.kz.
Onyń aitýynsha, jalpyulttyq aza tutý kúnine bailanysty eldegi memlekettik Týlar tómen túsirilip, oiyn-saýyq sharalary toqtatylǵan. Telearnalar men radiolardyń baǵdarlamalaryna ózgerister engizilip, birqatar aqparat quraldary qaraly kúnge sai jumys rejimine kóshken.
"Qaitys bolǵan áskeri qyzmetshilerdiń otbasylaryna taǵy da qaiǵysyna ortaqtasyp kóńil aitamyn. Jaýyngerler Otan aldyndaǵy áskeri boryshyn adal atqardy", – dedi Erlan Qarin.
Vitse-prezident qaza bolǵan áskeri qyzmetshilerdiń otbasylaryna jan-jaqty kómek pen qoldaý kórsetiletinin atap ótti.
Oqiǵanyń mán-jaiyn anyqtaý úshin arnaiy Úkimettik komissiia qurylyp, quqyq qorǵaý organdary tergeý jumystaryn júrgizip jatyr.
Sonymen qatar birqatar qazaqstandyq kásipkerler marqumdardyń otbasylaryna materialdyq kómek kórsetetinderin málimdegen.
"Halqymyz osynaý qiyn sátte taǵy da óziniń bereke-birligin kórsetip, aýyr qaiǵyny bólisip jatyr. Jurttyń yntymaǵy, memlekettiń beriktigi osyndai qysyltaiań shaqta bilinedi", – dedi memlekettik keńesshi.
Erlan Qarin qazaqstandyqtardy sabyr saqtaýǵa, bir-birine qoldaý kórsetýge jáne aýyr kezeńnen el bolyp birge ótýge shaqyrdy.
