Almatynyń Almaly aýdandyq sotynda QR Eńbek sińirgen qaıratkeri Erlan Bilálge qatysty sot úkimi shyǵaryldy. "Sot Erlan Biláldi QR Qylmystyq kodeksiniń 24-babynyń 3-bóligi jáne 366-baby boıynsha aıypty dep tanyp, 52 500 000 teńge kóleminde aıyppul salý týraly úkim shyǵarady", – dep oqydy úkimdi sýdıa.
Sondaı-aq, sot Biláldi memlekettik qyzmetterge ornalasý quqyǵynan ómir boıyna aıyrdy. Munymen qatar, sýdıa sottalýshynyń "Qazaqstannyń eńbek sińirgen qaıratkeri" ataǵynan aıyrý týraly usynys joldanatynyn málimdedi.
Oǵan QR Qylmystyq kodeksiniń 24-babynyń 3-bóligi jáne 366-babynyń 2-bóligi "Para alýǵa oqtalý" boıynsha aıyp taǵyldy. Sotqa deıingi tergeý organynyń málimeti boıynsha, Bilál "Sezam" qoǵamdyq qaıyrymdylyq shyǵarmashylyq qorynyń prezıdenti Qaırat Baıanovtan Áýezov teatrynyń qabyrǵasynda jańajyldyq qoıylymdar qoıý úshin 1,5 mıllıon teńge para almaq bolǵan.
Sotta sýdıa Qýanysh Áripov tórelik etti. Munyń aldynda Erlan Bilál qylmysyn moıyndaǵan bolatyn. "Syıaqy týraly kelistik, sosyn 2 qańtarda kezdesip, ol maǵan 600 myń teńge berdi. Ekinshi ret 4 qańtarda 900 myń teńge berdi de, men sol kúni ustaldym. Kinámdi tolyq moıyndaımyn, ókinish bildiremin. Basynda Baıanov maǵan ózi usynǵan. Bizde jylda shyrshalar, qoıylymdar ótedi. Ózi keldi. Qazaqsha aıtqanda rızalyǵyn bildirý úshin. Basynda somany da ózi aıtqan bolatyn. 600 myńdy qaıda jaratqanym esimde joq, qaryzdarymdy qaıtaryp júrgenmin. Eshkim qysym jasaǵan joq, kinámdi ózim moıyndadym", – degen edi Erlan Bilál sot otyrysy kezinde.
Aıta keteıik, Erlan Biláldiń advokaty istiń BAQ ókilderiniń qatysýynsyz ótýin suraǵan edi. Sýdıa taraptar pikirin tyńdap, aýdıojazbaǵa, sýretke jáne vıdeoǵa túsirýge tyıym saldy.
Munyń aldynda sot Erlan Biláldi kepilmen bosatqan edi. Ol 1 mıllıon 205 myń teńge kóleminde kepil somasyn berdi.
Eske salaıyq, 5 qańtarda QR eńbek sińirgen qaıratkeri, akter, M. Áýezov atyndaǵy Qazaq memlekettik akademıalyq drama teatry basshysy Erlan Bilálov 1,5 mıllıon teńge paramen ustalǵany habarlanǵan bolatyn. Kinásin tolyq moıyndaýyna baılanysty Erlan Bilálov qamaýǵa alynbady. Osydan keıin 9 qańtarda Áýezov teatry dırektory mindetin atqarýshy taǵaıyndalǵan. Al 17 qańtarda Erlan Biláldiń isi sotqa túsken edi.
https://dalanews.kz/33793
