"Erkindik qanaty" qoǵamdyq qory 23 tamyzda ótetin Quryltai sailaýyna qoǵamdyq baqylaýshy retinde qatyspaitynyn málimdedi. Uiym bul sheshimdi kúrdeli ári májbúrli qadam dep atady, dep habarlaidy dalanews.kz.
Qordyń málimetinshe, uiym 2016 jyldan beri Qazaqstandaǵy birde-bir sailaý naýqanyn baqylaýsyz qaldyrmaǵan. Alaida biylǵy Quryltai sailaýynda baqylaý júrgizýden bas tartý týraly sheshim qabyldanǵan.
"2016 jyldan beri qor birde-bir elektoraldyq naýqandy jibergen emes. Sondyqtan baqylaýdan bas tartý – kúrdeli ári májbúrli sheshim. Ol birqatar mańyzdy faktorlarǵa bailanysty qabyldandy", – delingen qordyń málimdemesinde.
Uiym mundai sheshimge birneshe sebep bolǵanyn atap ótti. Atap aitqanda, qor ókilderi sailaý 2019–2022 jyldary bastalǵan reformalardyń is júzinde toqtaýy jaǵdaiynda ótip jatqanyn, birmandatty okrýgterden kandidattardyń joqtyǵyn, balama saiasi ustanymdaǵy tirkelgen partiialardyń bolmaýyn, sondai-aq azamattyq qoǵam men buqaralyq aqparat quraldaryna qysymnyń kúsheigenin alǵa tartqan.
Sonymen birge qordyń pikirinshe, qalyptasqan quqyq qoldaný tájiribesi baqylaýshylardyń rólin formaldy deńgeige deiin tómendetip, olardyń konstitýtsiialyq quqyqtaryn tolyq júzege asyrýyna múmkindik bermeidi.
"Daýly sailaý máseleleri boiynsha ádil sot qaraýyna qol jetkizý múmkindigi joq. Bul baqylaýshylar qyzmetiniń tiimdiligine tikelei áser etedi", – dep málimdedi uiym.
«Erkindik qanaty» buǵan deiingi sailaý naýqandary kezinde baqylaýshylardy sailaý ýchaskelerinen negizsiz shyǵarý, uiym keńsesindegi internettiń buǵattalýy, salyqtyq tekserýler júrgizý áreketteri, baqylaýshylardyń jeke derekterine qatysty máseleler jáne uiym jumysyna aralasý áreketteri tirkelgenin de habarlady.
Sondai-aq qor "Qazaqstan Respýblikasyndaǵy sailaý týraly" Konstitýtsiialyq zańǵa engizilgen jańa normalar aldaǵy quqyq qoldaný tájiribesine qatysty alańdaýshylyq týǵyzatynyn málimdedi.
"Qazirgi jaǵdaida sailaý naýqanyna qatysý qor qyzmetkerleriniń, baqylaýshylar men eriktilerdiń jeke qaýipsizdigine tikelei qaýip tóndirýi jáne qor qyzmetiniń shektelýine ákelýi múmkin", – delingen málimdemede.
Osyǵan bailanysty «Erkindik qanaty» biylǵy sailaý naýqany aiasynda baqylaýshylardy qabyldamaitynyn, oqytpaitynyn, olarǵa kýálik bermeitinin jáne sailaý kúni ýchaskelerge jibermeitinin habarlady.
Málimdeme sońynda uiym memlekettik basqarý isine beijai qaramaityn azamattarǵa alǵys aityp, qyzmetin Human Rights Hub platformasy men basqa da jobalar aiasynda jalǵastyratynyn jetkizdi.
