Qazaqstandyq tanymal MMA faiteri ári akter Erkebulan Toqtar ákimshilik quqyq buzǵany úshin sot aldynda jaýap berdi, dep habarlaidy dalanews.kz.
Almatynyń mamandandyrylǵan aýdanaralyq ákimshilik soty sportshyny Ákimshilik quqyq buzýshylyq týraly kodekstiń 434-baby boiynsha kináli dep tanyǵan. Oǵan qoǵamdyq orynda bylapyt sóz aitqany úshin 20 AEK, iaǵni 86 500 teńge kóleminde aiyppul salyndy.
Bul týraly Almaty qalasynyń prokýratýrasy habarlady. Prokýratýranyń málimetinshe, quqyq qorǵaý organdary áleýmettik jelilerdi monitoringteý barysynda Erkebulan Toqtardyń beiádep sózder aitqan videosyn anyqtaǵan.
«Belgili bolý jaýapkershilikten bosatpaidy», – dep atap ótti prokýratýra.
Osydan keiin material sotqa joldanyp, Almaty soty sportshyny kináli dep tanydy.
Erkebulan Toqtar – qazaqstandyq MMA faiteri, kino akteri jáne bloger. Ol sporttaǵy ónerimen qatar, áleýmettik jelidegi belsendiligimen de kópshilikke tanymal. Biyl sportshy 30 jasqa toldy.
Bul oqiǵa da tanymal tulǵalar úshin áleýmettik jelidegi árbir árekettiń quqyqtyq saldary bolýy múmkin ekenin kórsetti.
