Tanymal akter ári faiter Erkebulan Toqtar jol apatyna tústi, dep habarlaidy dalanews.kz.
Akterdiń jelidegi paraqshasynda jariialanǵan videoǵa súiensek, bul oqiǵa keshe bolǵan. Video kadrynan onyń mototsikli kólikpen soqtyǵysqanyn kórýge bolady.
30 jastaǵy sportshynyń aitýynsha, oqiǵa saldarynan eshkim zardap shekpegen. Mototsikl de aitarlyqtai búlinbegen. Tek kólikke zaqym kelgen. Ol kólik júrgizýshisine materialdyq shyǵyndy ótegenin málimdedi.
Erkebulan Toqtar bolǵan jaǵdaidan keiin jolda asa saq bolý keregin aitqan. Ol bul jaǵdai ózine sabaq bolǵanyn da jetkizdi.
"Qudai saqtady. Alla taǵala "Erkebulan, azartyna kirme" degendei boldy. "Jol apaty qalai bolǵanyn túsinbei qalasyń" dep jai kórsetti", - dedi ol jelidegi paraqshasynda.
Aita keteiik, Erkebulan Toqtar pop-MMA týrnirlerinde óner kórsetip tanylǵan. Keiin kásipqoi jekpe-jekke aýysqan. Jýyrda Armeniiada ótken kezdesýinde ol qyrǵyzstandyq sportshy Marsel Nurlanbekulynan tóreshiler sheshimimen jeńilgen edi.
