Ereimentaý qalasynda qýaty 50 MVt jel elektr stantsiiasyn salýǵa arnalǵan aqshanyń urlaǵany belgili boldy. Shyǵyn mólsheri 8,5 mlrd teńgeden asady, dep habarlaidy Dalanews.kz.
Astana qalasynyń qylmystyq ister jónindegi aýdanaralyq soty alaiaqtyq, atap aitqanda, adamdar tobynyń aldyn ala sóz bailasýy arqyly, aldaý jáne senimdi teris paidalaný jolymen, iri jáne asa iri mólsherde jábirlenýshilerdiń aqshalai qarajatyn birneshe ret urlady dep aiyptalǵan eki adamǵa qatysty úkim shyǵardy.
B. jáne M. basqa adamdarmen birlesip, aldyn ala sóz bailasý arqyly áreket ete otyryp, 2020-2022 jyldar aralyǵynda "Samuryq-Energonyń" Ereymentau Wind Power enshiles kompaniiasynan Ereimentaýda jel elektr stansasyn salýǵa arnalǵan qarajatqa qol salǵan. Muny olar jalǵan kelisim-sharttarmen jáne affilirlengen kompaniialarǵa aqsha aýdarý arqyly jasaǵan. Keltirilgen shyǵyn mólsheri 8,5 mlrd teńgeden asady.
Sondai-aq, 2021 jyldyń qazan aiynda B. "P" aktsionerlik qoǵamymen transformatorlyq qosalqy stantsiialardy jetkizýge shart jasasqan, alaida óz mindettemelerin oryndamaǵan. Nátijesinde "P" aktsionerlik qoǵamyna 157 mln teńgeden astam shyǵyn keltirilgen.
Sot úkimimen B. 8 jyl 6 aiǵa bas bostandyǵynan aiyrylyp, memlekettik nagradasy – "Qurmet" ordeninen aiyryldy. Al M.-ǵa 6 jyl 8 ai bas bostandyǵynan aiyrý túrindegi jaza taǵaiyndaldy. "E" JShS-niń azamattyq talap qoiýy ishinara qanaǵattandyrylyp, 8,5 mlrd jáne 3 mln teńgeden astam sot shyǵystary óndirip alyndy.
