Hafiza hanym túrik ekonomikasy men aqsha-nesie saiasatyndaǵy álsiz tustardy jaqsy biledi.
Buǵan deiin túrik ekonomikasynyń eń álsiz jeri – Rejep Taiyp Erdoǵan bolyp kelgen edi. Biraq qaita sailanǵan Erdoǵan óz qateligin túsinip, endi ekonomikalyq kózqarasyn ózgertýge daiyn ekenin yqylas tanytyp otyr.
Hafizany Ortalyq bank tóraiymy laýazymyna, sonymen birge Merrill Lynch-tiń Londondaǵy bólimshesinde qyzmet etken Mehmet Shimshekti Qarjy ministri kreslosyna otyrǵyzýy – Túrkiia prezidentiniń ekonomikadaǵy máselelerdi retteý úshin "shok" terapiiasyna da daiyn ekendigin kórsetedi.
Hafiza-Shimshek tandemi liranyń kýrsyn turaqtandyryp, qarjy naryǵynda tynyshtyq ornatady degen senim mol.
Dál osy rette, senim kapitaly avans retinde oinaidy, endi Hafiza-Shimshek faktoryna senim artqan halyqaralyq investorlar, valiýtalyq brokerler túrik birjasyna qaita oralmaq. Bul kem degende +1 bazisti pýnkt.
Erdoǵanǵa tek Ortalyq Bank jumysyna aralaspaý kerek. Boldy, basqa eshteńe kerek emes.
Al Hafiza hanymnyń bazalyq stavkany kóteretini kúmán týǵyzbaidy. Túrkiia Ortalyq bankiniń stavka boiynsha otyrysy 22 maýsymda ótedi. JP Morgan analitikteri bazalyq stavka sol kezde 25 paiyzǵa jetedi dep boljap otyr.
Ankara infliatsiiany aýyzdyqtap, kýrsty joq degende dollaryna 12 liraǵa túsire alsa, onda AQSh investbanktarynan aýysyp kelgen túriktiń jas tolqyny óz otany aldynda boryshyn ótedi dep sanaýǵa bolady. Ázirge lira dollaryna 23-ke deiin quldyrap, antirekord jańartty.
22 maýsymda Túrkiia ekonomikanyń qai relsin tańdaǵanyn kóretin bolamyz. Turan ekonomikasynyń da taǵdyry sol kezde sheshiledi. Sondyqtan, Turan Odaǵyndaǵy ekonomikasy boiynsha nómiri ekinshi memleket - Qazaqstan da bir demin ishine tartyp, osy sátti kútip otyr.
Aibar OLJAEV, qarjy sarapshysy.
