Almaty ákimi Erbolat Dosaev Qytaiǵa resmi sapary barysynda QHR Jer silkinisteri agenttiginiń prezidenti Van Kýn myrzamen kezdesti, dep habarlaidy Dalanews.kz
Aita keteiik, Qytaidyń Jer silkinisteri agenttigi (China Earthquake Administration, CEA) – eldegi seismikalyq belsendilikti baqylaý, boljaý, seismikalyq qaýip-qaterdi baǵalaý jáne oǵan áreket etýge jaýapty memlekettik organ.
Erbolat Dosaev agenttiktiń tabiǵi apattar qaýpin azaitý baǵytyndaǵy jumysy týraly tanysyp, Almatyda seismikalyq qaýip-qaterdi tómendetý boiynsha júrgizilip jatqan sharalar týraly baiandady.
«Qazaqstan aýmaǵynyń 40%-dan astamy jer silkinisi qaýpi bar aimaqta ornalasqan. Biz Eýraziiadaǵy seismikalyq beldeýler júiesine kiremiz. Al Almatynyń ózi seismikalyq belsendi aimaqta ornalasqan. Sondyqtan «Almaty qalasyn 2025 jylǵa deiin damytý jáne 2030 jylǵa deiingi orta merzimdi perspektivalary» baǵdarlamasynda seismikalyq qaýipsizdikti qamtamasyz etý negizgi basymdyqtyń biri», – dedi Erbolat Dosaev.
Onyń aitýynsha, Almatyda kúshti jer silkinisterin boljaý jáne erte habarlaý úshin 28 stantsiia jumys isteidi, qosymsha 70 stantsiia ornatý josparlanǵan. Biyldyń ózinde 30 stantsiia ornatylsa, 2026 jyldyń sońyna deiin taǵy 40 stantsiia iske qosylady.
Kezdesý qorytyndysy boiynsha Qazaqstannyń seismologiialyq baiqaý jáne zertteýler ulttyq ǵylymi ortalyǵy men Qytaidyń Jer silkinisteri agenttiginiń Geofizika institýty arasynda seismikalyq monitoring jáne erte habarlaý júielerin biriktirý boiynsha birlesken jumys týraly kelisimge qol qoiyldy. Bul qujat eki el mamandaryna seismikalyq aqparatpen naqty ýaqyt rejiminde almasýǵa múmkindik beredi.
«Halyqty tabiǵi apattar týraly aldyn ala habardar etý jáne olardyń jer silkinisine daiyndyǵyn qamtamasyz etý – ózekti máseleniń biri. Osyǵan bailanysty CEA jáne Qytaidyń Geofizika institýtymen yntymaqtastyq biz úshin óte mańyzdy», – dep atap ótti Erbolat Dosaev.
Óz kezeginde QHR Jer silkinisteri agenttiginiń prezidenti Van Kýn myrza qol qoiylǵan kelisim Qazaqstan men Qytai arasyndaǵy seismikalyq qaýipsizdik salasyndaǵy yntymaqtastyqty nyǵaitýǵa mańyzdy qadam bolatynyna senim bildirdi. Sondai-aq, ol Almatynyń tabiǵi apattardy monitoringteý jáne oǵan áreket etý boiynsha úlken áleýetke ie ekenin atap ótip, CEA tarapynan seismikalyq monitoring pen erte áreket etý boiynsha tájiribe almasý barysynda jan-jaqty qoldaý kórsetiletinin aitty.
