Almatyda «Damý bala» baǵdarlamasyna qatysty júieli tártip ornatylady. Tek adal qyzmet kórsetetin jetkizýshiler jumys istei alady. Bul týraly qala ákimi Erbolat Dosaev Medeý aýdanynyń turǵyndarymen kezdesýde málimdedi.
Ákim Almaty elimizdegi «Damý bala» baǵdarlamasyna jetkilikti kólemde aqsha bólgen jalǵyz óńir ekenin atap ótti.
«Kópshiligi baǵdarlamany qysqartty. Bizde qalaǵa 16,5 mlrd teńge bólindi. Biz baǵdarlamany únemi qoldap otyramyz jáne ony odan saiyn jaqsartamyz dep úmittenemiz», - dedi ákim halyqtyń suraqtaryna jaýap bere otyryp.
Sondai-aq, ákim «Artsport» platformasynan «Damý bala» platformasyna kóshý kezinde eski vaýcherler qalǵanyn, olar osy jyldyń sońyna deiin jaramdy ekenin aitty.
«Jańa jylda – júieli tártip pen adal qyzmet kórsetetin kásipkerlerden turatyn jańa vaýcherler bolady. Baǵdarlamany qýana qoldaimyn jáne qajet bolsa «Damý bala» baǵdarlamasyn keńeitý úshin qosymsha qarjy kózderin tabamyn. Biz ótken jyldyń ekinshi jartysynan jáne biyldan bastap sapaly qyzmet kórsetýshilerdi tabýǵa tyrysamyz», - dedi ákim.
Sondai-aq, qala basshysy qarjy basqarmasy men Medeý aýdanynyń ákimdigine kásipkerlerge, «Damý bala» baǵdarlamasy boiynsha qyzmet kórsetýshilerge aqsha tóleýge qatysty máselelerdi sheshýdi tapsyrdy.
«Biz tamyz aiynyń sońyna deiin barlyq aktini salystyryp tekserip, tólem jasaimyz», - dedi aýdan ákimi Erkebulan Orazalin.
2023 jyldyń sáýir aiynda ortalyqsyzdandyrý aiasynda aýdan ákimdikterine «Damý bala» baǵdarlamasy boiynsha memlekettik shyǵarmashylyq jáne sporttyq tapsyrysty iske asyrý tapsyryldy.
