Ulttyq ulannyń áskeri bóliminde aýyr bas jaraqatyn alǵan merzimdi áskeri qyzmetshi Erbaian Muhtar isi boiynsha tergeý qalai júrip jatqanyn bas áskeri prokýrordyń birinshi orynbasary Máqsat Qaziev baiandady, dep habarlaidy Dalanews.kz.
"Qazirgi ýaqytta jedel-tergeý sharalary júrgizilip jatyr, tiisti saraptamalar taǵaiyndaldy. Saraptamalardyń qorytyndylary men tergeý nátijeleri, barlyq jinalǵan dálelder men faktilerdiń jiyntyǵy negizinde sheshim qabyldanady. Búgingi tańda tergeý nátijelerine qatysty pikir bildire almaimyz, sebebi bul kóptegen adamdardyń múddelerine áser etedi. Tergeý Bas prokýratýranyń, bas áskeri prokýrordyń jáne Ulttyq ulannyń erekshe baqylaýynda", dedi Qaziev.
Ol "naqty bir kúdiktiler joq, biraq anyqtalǵan adamdar toby bar" ekenin atap ótti.
Erbaian Muhtar 2023 jyldyń jeltoqsan aiynda aýrýhanaǵa tústi. Ulttyq ulannyń áskeri bólimindegiler ata-anasyna onyń ájethanada qulap, basyn plitkaǵa soqqanyn aitqan. Alaida, olar bul nusqaǵa senbei, Erbaiannyń soqqyǵa jyǵylǵanyn dáleldeýge tyrysty.
Qazaqstandyqtar jas sarbazdyń emine 230 million teńge kóleminde qarajat jinady. Qazirgi ýaqytta Muhtar Astanada, ol Túrkiiada emniń alǵashqy kezeńin aiaqtady.
