Eýroodaq Ýkrainadaǵy soǵystyń saldaryn eńserý úshin shyǵys shekaraǵa jaqyn aimaqtarǵa aýqymdy qarjylyq qoldaý kórsetpek, dep habarlaidy Dalanews.kz.
Bul týraly Eýrokomissiianyń óńirlik damý jónindegi komissary Raffaele Fitto Briýsselde málimdedi.
Jańa bastama aiasynda kópmilliardtyq nesieler men EO biýdjetiniń kelesi kezeńi sheńberinde qorǵanys pen shekara qaýipsizdigin kúsheitýge arnalǵan qarjy qarastyrylady. Qoldaý Finliandiia, Polsha, Slovakiia, Vengriia, Rýmyniia, Bolgariia, Estoniia, Latviia jáne Litva siiaqty Resei, Belarýs nemese Ýkrainamen shektesetin ne Qara teńiz jaǵalaýynda ornalasqan elderdiń shekaralyq óńirlerine baǵyttalady.
Eýrokomissiia dereginshe, bul aimaqtar sońǵy jyldary halyq sanynyń azaiýy, ekonomikalyq ósimniń baiaýlaýy jáne soǵysqa bailanysty infliatsiianyń kúsheiýi sekildi kúrdeli máselelerge tap bolǵan. Sonymen qatar qaýipsizdikti nyǵaitý úshin qosymsha investitsiialar qajet.
Osy maqsatta EastInvest atty arnaiy investitsiialyq platforma qurylady. Ol zardap shekken óńirlerdegi kásiporyndar men jergilikti bilik organdarynyń qarjylandyrýǵa qoljetimdiligin jeńildetýge tiis.
Buǵan deiin Eýroparlamenttiń qorǵanys jáne qaýipsizdik komiteti Ýkrainaǵa áskeri kómekti jedel kúsheitýge shaqyrǵan edi. Depýtattar Eýroparlamenttiń zańnamalyq jáne biýdjettik ókilettikterin paidalanyp, eýropalyq qorǵanys áleýetin arttyrýǵa jáne Ýkrainanyń qorǵanys ónerkásibin EO júiesine kiriktirýge daiyn ekenin málimdegen.
EO-nyń bul qadamy shyǵys shekaradaǵy geosaiasi qysym kúsheigen kezeńde qabyldanyp otyr.
