Jenevada Vashington men Kiev arasyndaǵy beibit kelisimdi daiarlaýǵa baǵyttalǵan kelissózder aiaqtaldy, dep habarlaidy Dalanews.kz.
Osy ýaqytta The Telegraph gazeti AQSh prezidenti Donald Tramptyń bastamasyna jaýap retinde ázirlengen Eýropalyq odaqtyń Ýkrainadaǵy soǵysty toqtatý josparynyń tolyq mátinin jariialady. Qujat 24 tarmaqtan turady.
"Aqyltai news" málimetinshe, EO Resei men Ýkrainany qurlyqta, áýede jáne teńizde atysty tolyq toqtatýǵa shaqyrady. Sondai-aq atysty toqtatý rejimin baqylaýǵa úshinshi elderdi tartý úshin kelissózder júrgizýdi usynady. Monitoringti AQSh jetekshiligindegi Ýkraina odaqtastary spýtnikter men drondar arqyly qashyqtan júzege asyrýy qarastyrylǵan.
Josparda Máskeý men Kiev tutqyndardy «bárin bárine» qaǵidasy boiynsha tolyq almastyrýy tiis ekeni kórsetilgen. Budan bólek, Resei qamaýda ustap otyrǵan barlyq beibit azamattardy bosatýy qajet. Territoriialyq máseleler boiynsha kez kelgen kelissóz atysty tolyq toqtatqannan keiin jáne qazirgi soǵys shebi boiymen júrgiziledi.
Josparǵa sáikes, Ýkrainaǵa AQSh pen birneshe eýropalyq elderdi qamtityn top arqyly quqyqtyq turǵyda bekitilgen qaýipsizdik kepildikteri beriledi. Bul kepildikter NATO Jarǵysynyń 5-babyna uqsas sipatqa ie bolmaq. Ýkraina Qarýly Kúshteri men qorǵanys ónerkásibine eshqandai shekteý qoiylmaidy, al el óz aýmaǵynda odaqtas kúshterdi ornalastyrý quqyǵyn alady.
Qujat Ýkraina EO-ǵa múshe bolatynyn, al NATO-ǵa kirýi aliansqa múshe barlyq memleketterdiń kelisimi bolǵan jaǵdaida múmkin ekenin atap ótedi. Sondai-aq Ýkraina AQSh-tyń qatysýymen Zaporoje AES-i men Kahovka sý elektr stantsiiasyn baqylaýdy qaita alady — bul úshin arnaiy halyqaralyq baqylaý mehanizmi jasalady.
Josparda Ýkraina tolyq qalpyna keltiriledi jáne soǵys saldarynan kelgen shyǵyn óteledi. Bul ótemaqy Resei aktivteri esebinen de júzege asýy múmkin. Reseidiń aktivteri Ýkrainaǵa keltirilgen ziian tolyq ótelmeiinshe buǵattaýly kúiinde qalady. Sanktsiialar turaqty beibit kelisim ornaǵan jaǵdaida kezeń-kezeńimen jeńildetiledi, al kelisim buzylǵan jaǵdaida qaita engiziledi.
