Talǵar aýdandyq ortalyq aýrýhanasynyń dárigerleri ómirine tikelei qaýip tóngen 25 jastaǵy patsientke shuǵyl operatsiia jasap, onyń ómirin saqtap qaldy, dep habarlaidy dalanews.kz.
Jas áiel jedel járdem arqyly aýrýhanaǵa ishtiń joǵarǵy bóligindegi qatty aýyrsyný, júrek ainý, qusý jáne dene qyzýynyń 38,7 gradýsqa deiin kóterilýine bailanysty jetkizilgen.
Dárigerler júrgizgen tekserý barysynda patsientten peritonit, pankreonekroz, pankreatogendi shok jáne kóp aǵzalyq jetkiliksizdik anyqtalǵan. Iaǵni uiqy bezi aýyr zaqymdanyp, naýqastyń ómirine tikelei qaýip tóngen. Mundai jaǵdaida ýaqyt joǵaltý adam ómirine áser etýi múmkin bolǵandyqtan, meditsina mamandary shuǵyl hirýrgiialyq aralasý týraly sheshim qabyldaǵan.
Operatsiia kezinde hirýrgter ortańǵy laparotomiia, ish qýysyn tekserý jáne ishperde artyndaǵy aimaqtardy drenajdaý jumystaryn júrgizgen. Operatsiialyq ústelde hirýrg-operator Tastanqulov Qýandyq Erbolatuly, assistent Kokrikov R.S., anesteziolog Amrin S.T. jáne operatsiialyq meiirbike Otarbaeva G.D. jumys istegen.
«Naýqas bizge óte aýyr jaǵdaida tústi, sondyqtan ýaqytty joǵaltpai, shuǵyl operatsiia jasaý týraly sheshim qabyldadyq. Operatsiia kezinde ish qýysynda aiqyn qabyný protsesi men uiqy beziniń aýyr zaqymdanǵanyn anyqtadyq. Negizgi maqsatymyz – infektsiianyń ári qarai taralýyna jol bermei, aǵzanyń qalypty jumysyn qalpyna keltirý boldy. Operatsiiadan keiin patsient birneshe kún boiy dárigerlerdiń turaqty baqylaýynda bolyp, qajetti em qabyldady. Qazir onyń jaǵdaiy turaqty, oń dinamika baiqaldy. Mundai jaǵdailarda ishtiń qatty jáne uzaqqa sozylǵan aýyrsynýyn elemei, der kezinde meditsinalyq kómekke júginý óte mańyzdy», – dedi hirýrg Qýandyq Erbolatuly.
Alaida operatsiia patsient úshin ómir úshin kúrestiń alǵashqy kezeńi ǵana bolǵan. Odan keiin ol dárigerlerdiń turaqty baqylaýynda bolyp, qarqyndy terapiia, infýziialyq em, parenteraldy tamaqtaný jáne bakteriiaǵa qarsy terapiia alǵan.
Meditsina qyzmetkerleri onyń jaǵdaiyndaǵy eń kishkentai ózgeristerdiń ózin baqylap, aǵzanyń qalpyna kelýine barynsha jaǵdai jasaǵan. Emniń onynshy táýligine qarai patsienttiń asqazan-ishek jolynyń jumysy birtindep qalpyna kele bastaǵan. Zerthanalyq kórsetkishteri jaqsaryp, aǵzasy júrgizilgen emge jaýap bergen. Al 25 táýlikten keiin áiel statsionardan shyǵarylyp, ambýlatoriialyq baqylaýǵa jiberilgen.
Oqiǵadaǵy taǵy bir nazar aýdararlyq jait – patsienttiń aýrý tarihynda aýyr pankreatittiń keń taralǵan qaýip faktorlary anyqtalmaǵan. Dárigerlerdiń málimetinshe, anamnezdegi mańyzdy faktorlardyń biri energetikalyq sýsyndardy shamadan tys tutyný bolǵan.
Mamandar energetikalyq sýsyndardaǵy kofein, taýrin jáne basqa da stimýliatorlardyń joǵary mólsheri qan tamyrlarynyń túiilýine, sýsyzdanýǵa jáne zat almasý buzylystaryna yqpal etýi múmkin ekenin atap ótken. Mundai ózgerister uiqy bezindegi qan ainalymyna áser etýi yqtimal.
Sonymen birge bul jaǵdaidy energetikalyq sýsyndardyń pankreonekrozǵa tikelei sebep bolǵanynyń dáleli retinde qarastyrýǵa bolmaidy. Dárigerlerdiń jazbasynda olardyń patsienttiń jaǵdaiyndaǵy yqtimal mańyzdy faktor bolǵany ǵana kórsetilgen.
Talǵar dárigerleriniń aitýynsha, bul jaǵdai kúrdeli diagnozdyń ózinde ýaqytyly sheshim qabyldaý, hirýrgiialyq sheberlik jáne meditsinalyq komandanyń úilesimdi jumysy qanshalyqty mańyzdy ekenin kórsetti.
Aita keteiik, 25 jastaǵy naýqas aýrýhanadan shyqty. Al onyń ómirin saqtap qalý úshin dárigerlerge táýlik boiy birneshe apta boiy kúresýge týra kelgen.
