Qazaqstan teatrlary jańa maýsymdy tyń qoiylymdarmen, halyqaralyq jobalarmen jáne jańarǵan infraqurylymmen ashady. 2025-2026 jylǵy maýsym qorytyndysy boiynsha elimizdiń teatrlarynda 16 myń spektakl qoiylyp, 410 premera sahnalandy. Olardy 2,8 millionnan astam kórermen tamashalady, dep habarlaidy dalanews.kz.
«Astana Balet» XIV teatr maýsymyn 28 jáne 29 tamyzda Korei ulttyq baletiniń gastrol aiasyndaǵy qoiylymdarymen ashady. Kórermen Adolf Adannyń mýzykasyna jazylǵan «Korsar» baletin tamashalaidy. Teatrdyń halyqaralyq baǵdarlamasy Vetnam, Frantsiia jáne Aýstriiadaǵy óner saparlarymen jalǵasyp, qazaqstandyq horeografiia men zamanaýi repertýar sheteldik kórermenge tanystyrylady.
«Astana Opera» XIV teatr maýsymyn 4 jáne 5 qyrkúiekte Ahmet Jubanov pen Latif Hamididiń «Abai» operasymen ashady. Biyl kompozitorlardyń 120 jyldyǵyna orai bul týyndynyń sahnalanýynyń máni airyqsha. Jańa maýsymda «Charli i Iren», «Tomiris» baletteri men balalarǵa arnalǵan «Arman» mýzykalyq spektakliniń premeralary ótedi. Balet trýppasynyń Italiiaǵa gastroli jáne Qazaqstan óńirlerindegi óner saparlary da josparlanǵan.
Abai atyndaǵy Qazaq ulttyq opera jáne balet teatry 93-maýsymyn Ábdijámil Nurpeiisovtiń «Qan men ter» trilogiiasynyń jelisimen qoiylǵan «Aqbala» ulttyq baletiniń premerasymen ashady. Týyndy alǵash ret balet sahnasynda qoiylady. Maýsymnyń ashylýy aiasynda opera, balet, simfoniialyq mýzyka, hor, djaz, etno jáne zamanaýi mýzykalyq baǵyttardy toǵystyratyn «Mura» Open-Air gala-kontserti de ótedi.
Jańa maýsymda balalarǵa arnalǵan qoiylymdarǵa da basymdyq beriledi. 2026 jyldyń qańtar-maýsym ailarynda teatrlar balalarǵa 3 948 spektakl kórsetip, ony 559 885 jas kórermen tamashalady. Bul baǵytta balalar men jasóspirimder teatrlary, qýyrshaq jáne jastar teatrlary jumys istep keledi.
Ǵabit Músirepov atyndaǵy Qazaq memlekettik akademiialyq balalar men jasóspirimder teatry biyl 80 jyldyq mereitoiyn atap ótedi. Mereitoi qarsańynda teatr halyqaralyq deńgeide birqatar jetistikke qol jetkizdi. «Ulpan» spektakli Bishkekte ótken «ART-ORDO» halyqaralyq teatr festivalinde Gran-pri ielenip, taǵy úsh atalym boiynsha júldege ie boldy.
2026 jyldyń alǵashqy jartyjyldyǵynda elimizdiń teatrlary 407 ret gastrol uiymdastyrdy. Onyń 394-i el ishinde, 13-i shetelde ótti. Aýqymdy jobalardyń qatarynda Abai atyndaǵy Qazaq ulttyq opera jáne balet teatrynyń Singapýrdaǵy jáne Ǵabit Músirepov atyndaǵy teatrdyń Túrkiiadaǵy gastroli bar.
Qazaqstan teatrlary halyqaralyq baiqaýlarda da birqatar jetistikke jetti. «Astana Opera» teatrynyń «El Voice» vokal toby «Soldatskii konvert» halyqaralyq baiqaý-festivaliniń Gran-pri júldesin jeńip aldy. Al teatr skripkashysy Baǵdat Ábilhanov Dalian qalasynda ótken GRAND ART EXPRESS-CHINA halyqaralyq baiqaýynda I oryn iegeri atandy.
Teatr ǵimarattaryn jańartý jumystary da jalǵasyp keledi. Almatyda Muhtar Áýezov atyndaǵy Qazaq ulttyq drama teatry qaita jańǵyrtylyp jatyr. Joba aiasynda ǵimarattyń tarihi kelbetin saqtap, injenerlik júielerin jańartý, kórermen men shyǵarmashylyq ujymǵa zamanaýi jaǵdai jasaý kózdelgen.
Natalia Sats atyndaǵy orys memlekettik akademiialyq balalar men jasóspirimder teatryn jańartý jumystary aiaqtalyp qaldy. Nysannyń qurylys daiyndyǵy – 98%. Tarihi ǵimarat pen jańa japsarjaidaǵy negizgi jumystar aiaqtalyp, injenerlik júieler men sahna jabdyqtary ornatyldy, ainalasy abattandyryldy. Ǵimarat 7 qarasha kúni teatrdyń týǵan kúninde qaita ashylady.
