Qyrǵyzstanda barlyq toilar, oiyn-saýyq oryndary, kafe, meiramhanalar men túngi klýbtar saǵat 22:00-de jumysyn toqtatýy tiis. Bul týraly Ministrler kabineti tóraǵasynyń orynbasary - Ulttyq qaýipsizdik komitetiniń basshysy Kamchybek Tashiev málimdedi, dep habarlaidy Dalanews.kz.
Onyń aitýynsha, bul sheshim «tynyshtyq týraly» zańǵa sáikes qabyldanǵan.
«Qaýlyny qabyldadyq, biraq ol oryndalyp jatqan joq. Men muny qaidan bildim? Jaqynda Bishkekte áriptesimniń toiy tún ortasyna deiin jalǵasqan, eshkim aralaspady. Jalal-Abadta da solai - olardyń toiy túngi on ekige deiin sozylǵan, biraq eshkim eskertý jasamaǵan», – dedi ol.
Tashievtiń aitýynsha, Ministrler kabineti qabyldaǵan qujatta jergilikti ózin-ózi basqarý organdarynyń «tynyshtyq týraly» zańnyń oryndalýyn qadaǵalaýǵa mindetti ekeni naqty jazylǵan.
«Jergilikti basshylar, sizder jazbasha tapsyrmany oryndamai otyrsyzdar. Endi resmi túrde tapsyrma beremin: barlyq jerde saǵat 22:00-den keiin toi, oiyn-saýyq, kafe, meiramhana, túngi klýbtardyń jumysy tolyq toqtaýy tiis. Eger bireý baǵynbasa, jaryqty ajyratyńdar», – dedi ol.
Ol sondai-aq saǵat 22:00-den keiin meiramhanalarda elektr qýaty óshiriletinin qosty.
