Soltústik óńirlerge qonys aýdarýdy yntalandyrý maqsatynda memleket azamattarǵa baspana satyp alýǵa 7 mln teńgege deiin qarjy bóledi, dep habarlaidy Dalanews.kz.
Habar arnasynyń málimetinshe, buǵan deiin bul tólemniń kólemi 4,5 mln teńge bolǵan.
Jańa talapqa sáikes, qonys aýdarýshylar baspanany óz qalaýynsha tańdai alady, al eger turǵyn úi quny belgilengen somadan asyp ketse, bólingen qarajat ipotekalyq nesieniń bir bóligin óteýge baǵyttalady.
Úkimet soltústik aimaqtarǵa kóshetin azamattarǵa keshendi qoldaý kórsetedi. Atap aitqanda, otbasynyń árbir múshesine birjolǵy aqshalai kómek beriledi, jumysqa ornalastyrý, kásiptik oqytý, sondai-aq kásip ashýǵa járdem qarastyrylǵan.
Biyl óńirlik kvota aiasynda 8 278 adamdy qonystandyrý josparlanǵan. Onyń ishinde Soltústik Qazaqstan oblysyna - 2 820, Pavlodar oblysyna - 1 655, Shyǵys Qazaqstanǵa - 600, Qostanai oblysyna - 485, Abai oblysyna - 275, Ulytaý oblysyna - 125, Qaraǵandy oblysyna - 37 adam bólingen.
Eńbek ministrliginiń málimetinshe, qonys aýdarýshylarǵa ár otbasy múshesine 302 myń teńge kóleminde birjolǵy tólem, sondai-aq turǵyn úidi jalǵa alý men kommýnaldyq shyǵyndardy óteý kózdelgen. Sonymen qatar, ekonomikalyq mobildilik sertifikatynyń mólsheri 1 160 AEK-ten 1 625 AEK-ke deiin ulǵaitylyp, shamamen 7 mln teńgege jetken.
Qazirgi tańda soltústik óńirlerde, ásirese meditsina, bilim jáne memlekettik qyzmet salalarynda kadr tapshylyǵy baiqalady. Máselen, Ulytaý oblysynda júzdegen bos jumys orny bar. Osyǵan bailanysty ońtústik óńirlerdiń turǵyndaryn tartý jumystary jalǵasyp jatyr.
Baǵdarlamaǵa qatysqan qonys aýdarýshylardyń biri Liza Nurdilla Túrkistan oblysynan Ulytaýǵa kóship kelgenin, ýáde etilgen kótermeaqy men qyzmettik baspana alǵanyn aitty. Al Mańǵystaý oblysynan Soltústik Qazaqstanǵa qonys aýdarǵan Nurbol Muqashev búginde mal sharýashylyǵymen ainalysyp, memlekettik qoldaýdyń arqasynda kásibin damytyp otyr.
