Eýraziialyq ekonomikalyq odaqqa (EAEO) múshe elder qazaqstandyq ǵalymdar men oqytýshylardyń ǵylymi ataqtaryn ózara taný týraly kelisimge qol qoidy. Bul sheshim ǵylymi jáne pedagogikalyq qyzmetkerlerdiń odaqqa múshe memleketterde jumysqa ornalasýyn jeńildetedi, dep habarlaidy dalanews.kz.
Ǵylymi ataqtardy qaita rastaýdyń qajeti bolmaidy
2026 jylǵy 6-7 tamyzda ótken Eýraziialyq úkimetaralyq keńestiń otyrysynda EAEO elderiniń úkimet basshylary ǵylymi ataqtar týraly qujattardy ózara taný jónindegi kelisimdi bekitti.
Qujatqa sáikes, múshe memleketterdiń ýákiletti organdary bergen aǵa ǵylymi qyzmetker, dotsent, qaýymdastyrylǵan professor (dotsent) jáne professor ǵylymi ataqtary ulttyq taný rásimderinsiz-aq ózara moiyndalady.
Osylaisha, Qazaqstanda berilgen ǵylymi ataq týraly qujattar Resei, Belarýs, Qyrǵyzstan jáne Armeniia aýmaǵynda qosymsha rastaýsyz jaramdy bolady.
Buryn berilgen qujattar da tanylady
Kelisim talaptary tek jańa qujattarǵa ǵana emes, qujat kúshine engenge deiin berilgen ǵylymi ataqtarǵa da qoldanylady.
Bul ǵylymi jáne ǵylymi-pedagogikalyq qyzmetkerlerdiń EAEO elderinde erkin eńbek etýine múmkindik berip, jumysqa ornalasý kezindegi ákimshilik kedergilerdi azaitady.
Ýaqyt pen qarjy únemdeledi
Mamandardyń aitýynsha, kelisim azamattardyń ǵylymi ataqtaryn dáleldeýge ketetin ýaqytyn qysqartyp, qosymsha qarjylyq shyǵyndardyń aldyn alady.
Aita keteiik, buǵan deiin 2024 jylǵy 2 mamyrdan bastap EAEO elderinde ǵylymi dárejeler týraly qujattardy ózara taný týraly kelisim kúshine engen bolatyn. Endi bul tizimge ǵylymi ataqtar da qosylyp otyr.
