Qazaqstanda sapasy tómen joldarmen júrgeni úshin aqy tóleý júıesin alyp tastaý kózdelip otyr. Bul jónindegi tıisti ózgerister jobasyn Kólik mınıstrligi «Ashyq NQA» portalynda jarıalady, dep habarlaıdy Dalanews.kz.

Túzetýler aqyly joldarmen júrý tártibin jeńildetýge baǵyttalǵan jáne "quqyqtyq naqtylyqty arttyrý" maqsatynda ázirlengen. Qujat 26 mamyrǵa deıin qoǵamdyq talqylaýda bolady. Jańa ereje bıyl maýsym aıynda kúshine enýi múmkin.

Buǵan deıin "QazAvtoJol" ulttyq kompanıasynyń basshysy Darhan Imanashev bul normany engizý boıynsha atqarylyp jatqan jumystar jaıly baıandaǵan edi.

"Eger aqyly jol ýchaskesinde qyzmet sapasy tómen bolsa — mysaly, keptelis, qardan ýaqtyly tazartpaý nemese jóndeý jumystary júrgizilip jatsa — biz sol naqty bólikti, ıaǵnı jóndelip jatqan nemese aqaýy bar tusyn aqysyz etemiz. Barlyq jol emes, tek sol bóligi ǵana tegin bolady", — dep túsindirgen edi ol.

Kolesa.kz portalynyń málimetinshe, eger aqyly joldyń jalpy uzyndyǵy 100 shaqyrym bolsa, onyń 10 shaqyrymy jóndeýde tursa nemese sapasy syn kótermese, júrgizýshiler qalǵan 90 shaqyrym úshin ǵana aqy tóleıdi. Alaıda sapasyz jol bólikteri úshin aqy qalaı esepteletini jáne olardyń naqty uzyndyǵy qandaı tásilmen ólshenetini ázirge belgisiz.