قازاقستاندا ساپاسى تومەن جولدارمەن جۇرگەنى ءۇشىن اقى تولەۋ جۇيەسىن الىپ تاستاۋ كوزدەلىپ وتىر. بۇل جونىندەگى ءتيىستى وزگەرىستەر جوباسىن كولىك مينيسترلىگى «اشىق نقا» پورتالىندا جاريالادى، دەپ حابارلايدى Dalanews.kz.

تۇزەتۋلەر اقىلى جولدارمەن ءجۇرۋ ءتارتىبىن جەڭىلدەتۋگە باعىتتالعان جانە "قۇقىقتىق ناقتىلىقتى ارتتىرۋ" ماقساتىندا ازىرلەنگەن. قۇجات 26 مامىرعا دەيىن قوعامدىق تالقىلاۋدا بولادى. جاڭا ەرەجە بيىل ماۋسىم ايىندا كۇشىنە ەنۋى مۇمكىن.

بۇعان دەيىن "قازاۆتوجول" ۇلتتىق كومپانياسىنىڭ باسشىسى دارحان يماناشيەۆ بۇل نورمانى ەنگىزۋ بويىنشا اتقارىلىپ جاتقان جۇمىستار جايلى بايانداعان ەدى.

"ەگەر اقىلى جول ۋچاسكەسىندە قىزمەت ساپاسى تومەن بولسا — مىسالى، كەپتەلىس، قاردان ۋاقتىلى تازارتپاۋ نەمەسە جوندەۋ جۇمىستارى جۇرگىزىلىپ جاتسا — ءبىز سول ناقتى بولىكتى، ياعني جوندەلىپ جاتقان نەمەسە اقاۋى بار تۇسىن اقىسىز ەتەمىز. بارلىق جول ەمەس، تەك سول بولىگى عانا تەگىن بولادى"، — دەپ تۇسىندىرگەن ەدى ول.

Kolesa.kz پورتالىنىڭ مالىمەتىنشە، ەگەر اقىلى جولدىڭ جالپى ۇزىندىعى 100 شاقىرىم بولسا، ونىڭ 10 شاقىرىمى جوندەۋدە تۇرسا نەمەسە ساپاسى سىن كوتەرمەسە، جۇرگىزۋشىلەر قالعان 90 شاقىرىم ءۇشىن عانا اقى تولەيدى. الايدا ساپاسىز جول بولىكتەرى ءۇشىن اقى قالاي ەسەپتەلەتىنى جانە ولاردىڭ ناقتى ۇزىندىعى قانداي تاسىلمەن ولشەنەتىنى ازىرگە بەلگىسىز.