Qarjy vitse-ministri Dáýren Keńbeiil “Memlekettik satyp alý týraly” jańa Zańnyń alǵashqy nátijelerimen tanystyryp, endi konkýrs jeńimpazy nebári 5 kúnde ishinde anyqtalatynyn málimdedi, dep habarlaidy Dalanews.kz.
Qujat normalaryna sáikes, áleýetti jetkizýshilerdiń jaýapkershiligi kúsheitildi. Budan bylai jemqorlyq úshin sottalǵan, jalaqy boiynsha qaryzdary bar áleýetti jetkizýshiler konkýrsqa qatysa almaidy.
Jańa zań satyp alý rásimderiniń merzimderin qysqartýdy kózdeidi. Buǵan deiin memlekettik satyp alý salasyndaǵy problemalardyń biri rásimderdiń uzaqqa sozylýy bolǵan edi. Konkýrsty ótkizý merzimi kem degende eki aidy quraǵan. Osyǵan orai, Zańdy júzege asyrý sheńberinde rásimderdiń merzimderi qaita qaraldy.
“1 qańtarǵa deiin ashyq konkýrs 60 kúnge deiin sozylsa, qazir ol 10 kúnge deiin qysqartyldy. Reitingtik-baldyq júie arqyly áleýetti jetkizýshiler adamnyń aralasýynsyz, tek aqparattyq derekter negizinde anyqtalady. Bul júiede konkýrs jeńimpazy 5 kúnniń ishinde belgili bolady. Aýktsion júiesiniń de merzimi 60 kúnnen 10 kúnge deiin qysqardy. Al baǵalardy usyný konkýrsy osyǵan deiin 5 kún júrgizilse, qazir bul merzim 2-aq kúndi quraidy”, — dedi Dáýren Keńbeiil.
Sonymen birge ol shaǵymdardy qaraý merzimi de edáýir qysqarǵanyn jetkizdi.
“Kelesi jańashyldyqtar – avtomattandyrý tehnologiialaryn keńinen qoldaný. Biz reitingtik ball júiesin keńinen qoldanyp, ony jetildirip jatyrmyz jáne mańyzdy jańashyldyqtardyń biri – ol shaǵymdaný protsesin qaita qaradyq. 1 qańtardan bastap shaǵymdaný protsesi ózgerdi. Buǵan deiin shaǵymdar bizdiń jergilikti aýdit organdaryna keletin bolsa, qazir shaǵymdar konkýrsty jariialaǵan tapsyrys berýshige kelip túsedi. Ekinshiden, shaǵymdy qaraý merzimderi meilinshe qysqartyldy", – dedi spiker.
Onyń sózinshe, kásipkerler úshin birqatar jeńildik qarastyrylǵan. Atap aitqanda, 30%-ǵa deiingi artyqshylyqtar berilip, aiyppul mólsherin azaitý múmkindigi qarastyrylyp otyr.
