Qazaqstanda múmkindigi shekteýli azamattarǵa beriletin ońaltý quraldaryn usyný tártibi ózgerýi múmkin. Endi mundai quraldar qaitarym negizinde jalǵa berilmek. Bul týraly Eńbek jáne halyqty áleýmettik qorǵaý ministri Asqarbek Ertaev málimdedi, dep habarlaidy Dalanews.kz.
Ministrdiń aitýynsha, qazirgi júie boiynsha ońaltý quraldary azamattarǵa birjola berilip kelgen. Alaida bul tásil olardyń naqty tehnikalyq jai-kúiin, tozý deńgeiin jáne jóndeý múmkindigin tolyq eskermeidi. Osyǵan bailanysty jańa mehanizm engizilip, quraldar ýaqytsha paidalaný shartymen berilip, keiin qaita qabyldanady.
Jańa tártipke sáikes, paidalanýdan qaitarylǵan tehnikalyq quraldar arnaiy saraptamadan ótedi. Onyń qorytyndysyna qarai, quraldy jóndeýge, qaita paidalanýǵa, jalǵa berýge nemese esepten shyǵarýǵa qatysty sheshim qabyldanady.
Eger aqaý anyqtalsa, qural jóndeýge jiberilip, keiin qaita ainalymǵa engiziledi. Al paidalanýǵa jaramsyz dep tanylsa, esepten shyǵarylyp, ótinish berýshige jańasy usynylady. Vedomstvo basshysy bul tásil ońaltý quraldaryna qoljetimdilikti arttyryp, olardy berý merzimin qysqartatynyn atap ótti.
Joba biyl maýsym aiynan bastap Aqtóbe, Qaraǵandy jáne Pavlodar oblystarynda pilottyq rejimde iske qosylady. Al ony el kóleminde keńeitý jyldyń ekinshi jartysyna josparlanyp otyr.
