قازاقستاندا مۇمكىندىگى شەكتەۋلى ازاماتتارعا بەرىلەتىن وڭالتۋ قۇرالدارىن ۇسىنۋ ءتارتىبى وزگەرۋى مۇمكىن. ەندى مۇنداي قۇرالدار قايتارىم نەگىزىندە جالعا بەرىلمەك. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ مالىمدەدى، دەپ حابارلايدى Dalanews.kz.
ءمينيستردىڭ ايتۋىنشا، قازىرگى جۇيە بويىنشا وڭالتۋ قۇرالدارى ازاماتتارعا ءبىرجولا بەرىلىپ كەلگەن. الايدا بۇل ءتاسىل ولاردىڭ ناقتى تەحنيكالىق جاي-كۇيىن، توزۋ دەڭگەيىن جانە جوندەۋ مۇمكىندىگىن تولىق ەسكەرمەيدى. وسىعان بايلانىستى جاڭا مەحانيزم ەنگىزىلىپ، قۇرالدار ۋاقىتشا پايدالانۋ شارتىمەن بەرىلىپ، كەيىن قايتا قابىلدانادى.
جاڭا تارتىپكە سايكەس، پايدالانۋدان قايتارىلعان تەحنيكالىق قۇرالدار ارنايى ساراپتامادان وتەدى. ونىڭ قورىتىندىسىنا قاراي، قۇرالدى جوندەۋگە، قايتا پايدالانۋعا، جالعا بەرۋگە نەمەسە ەسەپتەن شىعارۋعا قاتىستى شەشىم قابىلدانادى.
ەگەر اقاۋ انىقتالسا، قۇرال جوندەۋگە جىبەرىلىپ، كەيىن قايتا اينالىمعا ەنگىزىلەدى. ال پايدالانۋعا جارامسىز دەپ تانىلسا، ەسەپتەن شىعارىلىپ، ءوتىنىش بەرۋشىگە جاڭاسى ۇسىنىلادى. ۆەدومستۆو باسشىسى بۇل ءتاسىل وڭالتۋ قۇرالدارىنا قولجەتىمدىلىكتى ارتتىرىپ، ولاردى بەرۋ مەرزىمىن قىسقارتاتىنىن اتاپ ءوتتى.
جوبا بيىل ماۋسىم ايىنان باستاپ اقتوبە، قاراعاندى جانە پاۆلودار وبلىستارىندا پيلوتتىق رەجيمدە ىسكە قوسىلادى. ال ونى ەل كولەمىندە كەڭەيتۋ جىلدىڭ ەكىنشى جارتىسىنا جوسپارلانىپ وتىر.
