Qazaqstandyqtar bireýdiń ETsQ-syn paidalanǵany úshin jaýapkershilikke tartylady,- dep habarlaidy Dalanews.kz.
Endi jeke jáne zańdy tulǵalardyń derbes derekterin qorǵaý jáne elektrondyq tsifrlyq qoltańba salalaryndaǵy ákimshilik quqyqbuzýshylyqtar úshin ákimshilik jaýapkershilikke tartý merzimi quqyqbuzýshylyq jasalǵan kúnnen bastap eki aidan bir jylǵa deiin uzartyldy. Jańa normalar 2025 jylǵy 13 naýryzdan bastap kúshine endi.
"Derbes derekter jáne olardy qorǵaý týraly zańnamany buzý, atap aitqanda, derbes derekterdi zańsyz jinaý, óńdeý jáne olardy qorǵaý sharalaryn saqtamaý úshin QR ÁQBtK-niń 79-baby boiynsha ákimshilik aiyppuldardyń mólsheri úsh ese ulǵaitylady. Buryn aiyppuldar quqyq buzýshylyqtyń quramyna jáne kásipkerlik sýbektisiniń sanatyna bailanysty 10-nan 1000 AEK-ke deiin ózgerip otyrǵan. Endi olar 30-dan 2000 AEK-ke deiin ulǵaitylady", - dep jazylǵan ministrlik habarlamasynda.
Budan bólek, Qazaqstan Respýblikasynyń elektrondyq qujat jáne elektrondyq tsifrlyq qoltańba týraly zańnamasyn buzǵany úshin QR ÁQBtK-niń 640-baby boiynsha jańa ákimshilik quqyq buzýshylyq túri kúshine enedi. Iaǵni basqa adamnyń ETsQ kiltin paidalanǵany úshin ákimshilik jaýapkershilik qarastyrylady.
Buǵan deiin ákimshilik jaýapkershilik tek ETsQ kiltin úshinshi tulǵalarǵa zańsyz berý jáne ony qorǵaý boiynsha tirkeý kýáliginiń iesi tarapynan qajet sharalardy qabyldamaý jaǵdailaryna ǵana qoldanylatyn.
Ózgerister kúshine engennen keiin ETsQ-ny zańsyz bergen de, ony paidalanǵan tulǵalar jaýapkershilikke tartylady.
"Qabyldanǵan sharalar azamattardyń derbes derekterin qorǵaýdy kúsheitýge, elektrondyq tsifrlyq qoltańbany paidalanýdyń qaýipsizdigin qamtamasyz etýge jáne aqparattandyrý salasyndaǵy zańbuzýshylyqtar úshin jaýapkershilikti arttyrýǵa baǵyttalǵan", - dep jazylǵan habarlamada.
