قازاقستاندىقتار بىرەۋدىڭ ەسق-سىن پايدالانعانى ءۇشىن جاۋاپكەرشىلىككە تارتىلادى،- دەپ حابارلايدى Dalanews.kz.
ەندى جەكە جانە زاڭدى تۇلعالاردىڭ دەربەس دەرەكتەرىن قورعاۋ جانە ەلەكتروندىق سيفرلىق قولتاڭبا سالالارىنداعى اكىمشىلىك قۇقىقبۇزۋشىلىقتار ءۇشىن اكىمشىلىك جاۋاپكەرشىلىككە تارتۋ مەرزىمى قۇقىقبۇزۋشىلىق جاسالعان كۇننەن باستاپ ەكى ايدان ءبىر جىلعا دەيىن ۇزارتىلدى. جاڭا نورمالار 2025 جىلعى 13 ناۋرىزدان باستاپ كۇشىنە ەندى.
"دەربەس دەرەكتەر جانە ولاردى قورعاۋ تۋرالى زاڭنامانى بۇزۋ، اتاپ ايتقاندا، دەربەس دەرەكتەردى زاڭسىز جيناۋ، وڭدەۋ جانە ولاردى قورعاۋ شارالارىن ساقتاماۋ ءۇشىن ق ر اقبتك-نىڭ 79-بابى بويىنشا اكىمشىلىك ايىپپۇلداردىڭ مولشەرى ءۇش ەسە ۇلعايتىلادى. بۇرىن ايىپپۇلدار قۇقىق بۇزۋشىلىقتىڭ قۇرامىنا جانە كاسىپكەرلىك سۋبەكتىسىنىڭ ساناتىنا بايلانىستى 10-نان 1000 اەك-كە دەيىن وزگەرىپ وتىرعان. ەندى ولار 30-دان 2000 اەك-كە دەيىن ۇلعايتىلادى"، - دەپ جازىلعان مينيسترلىك حابارلاماسىندا.
بۇدان بولەك، قازاقستان رەسپۋبليكاسىنىڭ ەلەكتروندىق قۇجات جانە ەلەكتروندىق سيفرلىق قولتاڭبا تۋرالى زاڭناماسىن بۇزعانى ءۇشىن ق ر اقبتك-نىڭ 640-بابى بويىنشا جاڭا اكىمشىلىك قۇقىق بۇزۋشىلىق ءتۇرى كۇشىنە ەنەدى. ياعني باسقا ادامنىڭ ەسق كىلتىن پايدالانعانى ءۇشىن اكىمشىلىك جاۋاپكەرشىلىك قاراستىرىلادى.
بۇعان دەيىن اكىمشىلىك جاۋاپكەرشىلىك تەك ەسق كىلتىن ءۇشىنشى تۇلعالارعا زاڭسىز بەرۋ جانە ونى قورعاۋ بويىنشا تىركەۋ كۋالىگىنىڭ يەسى تاراپىنان قاجەت شارالاردى قابىلداماۋ جاعدايلارىنا عانا قولدانىلاتىن.
وزگەرىستەر كۇشىنە ەنگەننەن كەيىن ەسق-نى زاڭسىز بەرگەن دە، ونى پايدالانعان تۇلعالار جاۋاپكەرشىلىككە تارتىلادى.
"قابىلدانعان شارالار ازاماتتاردىڭ دەربەس دەرەكتەرىن قورعاۋدى كۇشەيتۋگە، ەلەكتروندىق سيفرلىق قولتاڭبانى پايدالانۋدىڭ قاۋىپسىزدىگىن قامتاماسىز ەتۋگە جانە اقپاراتتاندىرۋ سالاسىنداعى زاڭبۇزۋشىلىقتار ءۇشىن جاۋاپكەرشىلىكتى ارتتىرۋعا باعىتتالعان"، - دەپ جازىلعان حابارلامادا.
