Endi bir bes jyl ótken soń...
– Meniń bir baiqaǵanym, bilik qoǵam ishinde aitylyp jatqan usynystarǵa, syni pikirlerge qansha degenmen kóńil aýdaryp jatqan siiaqty. Úmitkerlerdi usyný, daýys jinaý naýqandarynan keiin tizimge iligetinderdiń barlyǵy birdei osy sailaýda aǵymdaǵy Memleket basshysynan ozyp, jeńiske jetýi yqtimal degenge men, árine, senbeimin. Biraq, ótken jyldardaǵy sailaý naýqandaryna qaraǵanda ózgeris bar. Jáne de osy jyldyń bir ereksheligi - sailaýǵa qazaq tuǵyrynda turǵan, qazaq memleketshilderiniń belsendilik tanytýy. Mysaly, sailaýǵa Jarylqap Qalybai myrzanyń túsýi oń qubylys dep sanaimyn.
– 1999 jáne 2005 jylǵy sailaýlar kádimgidei dúbirli, ilanymdy deńgeide ótip edi. Nege jyl saiyn prezidenttik sailaýdyń máni de, mazmuny da ózgerip barady?
– 1999 jáne 2005 jyldardaǵy naýqannyń basty ereksheligi, naýqandardyń qyzý, tartysty ótýiniń sebebi, ol kezde myqty oppozitsiialyq partiialar bar bolatyn. Búginde el ishinde shynaiy oppozitsiialyq partiialar atymen joq. Olardyń ornyn azamattyq qoǵam basyp alýǵa tyrysýda. Bul zańdy qubylys. Mysaly, osy naýqanda jaqsy kózge túsken azamattar aldaǵy ýaqytta partiia qurýǵa, partiialardy basqarýǵa óz ambitsiialaryn tanytýǵa moraldyq quqyq ala alady. Osy jaǵyn da myqtap eskerý qajet shyǵar.
– Buryn sailaý dese, el ishi qyzý pikirtalasqa, ártúrli is-sharaǵa tolyp ketetin. Bul jolǵy sailaýda ondai eshteńe baiqalmaidy. Halyq tym naraý kórinedi. Munyń sebebi nede?
– Jurtshylyq sailaýdyń qalai ótetini, onda kim jeńetini týraly búginnen-aq habardar. Osy sebepti de asqan talas joq. Eger balama úmitkerler osy sailaýda qyzyq jobalar, oilar, júrister jasai alsa, onda áńgime qyza túsedi. Barlyǵy úmitkerler men olardyń shtabtarynyń jumysyna bailanysty bolady.
– Endi bir 5 jyl ozǵan soń... qandai sailaý ótýi múmkin?
– Ol sailaý 80-85 paiyz qazaq taqyryby men qazaq múddesi turǵysynda ótetin sailaý bolady. Búgingini soǵan daiyndyq dep eseptei berińizder.
