ەندى ءبىر بەس جىل وتكەن سوڭ...

Dalanews 20 ناۋ. 2015 05:19 160

– پرەزيدەنتتىك سايلاۋعا تىزىمدەلگەن ۇمىتكەرلەردىڭ ىشىندە (نازاربايەۆتان باسقا) ەلگە سىيلى، بەدەلدى ازامات بار ما؟ كىمنىڭ كانديداتۋراسى وسى سايلاۋعا ۇيالماي ۇسىنۋعا لايىق دەپ تانيسىز؟

– مەنىڭ ءبىر بايقاعانىم، بيلىك قوعام ىشىندە ايتىلىپ جاتقان ۇسىنىستارعا، سىني پىكىرلەرگە قانشا دەگەنمەن كوڭىل اۋدارىپ جاتقان سياقتى. ۇمىتكەرلەردى ۇسىنۋ، داۋىس جيناۋ ناۋقاندارىنان كەيىن تىزىمگە ىلىگەتىندەردىڭ بارلىعى بىردەي وسى سايلاۋدا اعىمداعى مەملەكەت باسشىسىنان وزىپ، جەڭىسكە جەتۋى ىقتيمال دەگەنگە مەن، ارينە، سەنبەيمىن. ءبىراق، وتكەن جىلدارداعى سايلاۋ ناۋقاندارىنا قاراعاندا وزگەرىس بار. جانە دە وسى جىلدىڭ ءبىر ەرەكشەلىگى - سايلاۋعا قازاق تۇعىرىندا تۇرعان، قازاق مەملەكەتشىلدەرىنىڭ بەلسەندىلىك تانىتۋى. مىسالى، سايلاۋعا جارىلقاپ قالىباي مىرزانىڭ ءتۇسۋى وڭ قۇبىلىس دەپ سانايمىن.

– 1999 جانە 2005 جىلعى سايلاۋلار كادىمگىدەي ءدۇبىرلى، يلانىمدى دەڭگەيدە ءوتىپ ەدى. نەگە جىل سايىن پرەزيدەنتتىك سايلاۋدىڭ ءمانى دە، مازمۇنى دا وزگەرىپ بارادى؟

– 1999 جانە 2005 جىلدارداعى ناۋقاننىڭ باستى ەرەكشەلىگى، ناۋقانداردىڭ قىزۋ، تارتىستى ءوتۋىنىڭ سەبەبى، ول كەزدە مىقتى وپپوزيسيالىق پارتيالار بار بولاتىن. بۇگىندە ەل ىشىندە شىنايى وپپوزيسيالىق پارتيالار اتىمەن جوق. ولاردىڭ ورنىن ازاماتتىق قوعام باسىپ الۋعا تىرىسۋدا. بۇل زاڭدى قۇبىلىس. مىسالى، وسى ناۋقاندا جاقسى كوزگە تۇسكەن ازاماتتار الداعى ۋاقىتتا پارتيا قۇرۋعا، پارتيالاردى باسقارۋعا ءوز امبيسيالارىن تانىتۋعا مورالدىق قۇقىق الا الادى. وسى جاعىن دا مىقتاپ ەسكەرۋ قاجەت شىعار.

–  بۇرىن سايلاۋ دەسە، ەل ءىشى قىزۋ پىكىرتالاسقا، ءارتۇرلى ءىس-شاراعا تولىپ كەتەتىن. بۇل جولعى سايلاۋدا ونداي ەشتەڭە بايقالمايدى. حالىق تىم ناراۋ كورىنەدى. مۇنىڭ سەبەبى نەدە؟

– جۇرتشىلىق سايلاۋدىڭ قالاي وتەتىنى، وندا كىم جەڭەتىنى تۋرالى بۇگىننەن-اق حاباردار. وسى سەبەپتى دە اسقان تالاس جوق. ەگەر بالاما ۇمىتكەرلەر وسى سايلاۋدا قىزىق جوبالار، ويلار، جۇرىستەر جاساي السا، وندا اڭگىمە قىزا تۇسەدى. بارلىعى ۇمىتكەرلەر مەن ولاردىڭ شتابتارىنىڭ جۇمىسىنا بايلانىستى بولادى.

– ەندى ءبىر 5 جىل وزعان سوڭ... قانداي سايلاۋ ءوتۋى مۇمكىن؟

– ول سايلاۋ 80-85 پايىز قازاق تاقىرىبى مەن قازاق مۇددەسى تۇرعىسىندا وتەتىن سايلاۋ بولادى. بۇگىنگىنى سوعان دايىندىق دەپ ەسەپتەي بەرىڭىزدەر.

ۇسىنىلعان
سوڭعى جاڭالىقتار
x