Qorǵanys ministrligi merzimdi áskeri boryshyn ótep júrgen sarbazdarǵa "kredittik demalys" berý sharasyn qolǵa aldy, dep habarlaidy Dalanews.kz.
"Qazirgi ýaqytta 17 myńnan astam áskeri qyzmetshi jalpy somasy 6,6 mlrd teńge bolatyn negizgi qaryz ben syiaqyny tóleýdi keiinge qaldyrý múmkindigin aldy", – dep málimdedi vedomstvo ókilderi.
Ministrlik bul bastama sarbazdarǵa boryshyn óteý kezinde nesie tóleý máselesin ýaiymdamai, qyzmetin atqarýǵa múmkindik beretinin atap ótti.
"Biz qarjy uiymdary jáne retteýshi agenttikpen arnaiy algoritm ázirledik. Áskerge shaqyrý naýqany kezinde jinalǵan bank qaryzdary men mikrokreditter týraly aqparat qarjy naryǵyn retteý jáne damytý agenttigine joldanady. Osy derekter negizinde kreditorlar negizgi qaryz ben syiaqy tólemderin keiinge qaldyrý jáne bereshekti óndirip alý sharalaryn ýaqytsha toqtatady", – delingen habarlamada.
Ministrlik nesie berýshilerdiń bul kezeńde qaryzdy óndirip alý úshin sotqa júginbeitinin jáne qandai da bir májbúrleý sharalaryn júrgizbeitinin aitty.
"Tólemderdi keiinge qaldyrý kezeńinde nesie berýshi sot isin júrgizýdi, bereshekti óndirip alý boiynsha notariýsqa júginýdi, turǵyn úidi satýdy, qaryz alýshynyń otbasyn shyǵarýdy toqtatady. Sondai-aq, burynǵy sot sheshimderi boiynsha bereshekti májbúrli túrde tóleý de júzege asyrylmaidy", – dep naqtylady vedomstvo.
