Jiynda aldymen «Samuryq Energo» AQ Basqarma tóraǵasy Baqytjan Jolamanov júzdesýge kelgendegi maqsat-mindetterine qysqasha toqtalyp ótti. Ol óz sózinde «Samuryq Energo» investitsiia salý jaǵynan jáne iri salyq tóleýshi retinde Almaty oblysynyń senimdi seriktesi ekenin atap ótti.
Elbasynyń tapsyrmalaryna jáne Prezidenttiń alǵa qoiǵan mindetterine sáikes kompaniia tutas elimizben qatar, oblys aýmaǵynda da birqatar iri jobalardy qolǵa alýǵa nietti.
Jobalar men olarǵa qatysty ákimdik tarapynan qoldaýdy qajetsinetin máseleler jaily Jobalyq keńse jetekshisi Ańsar Aidarov baiandady. Ol «Almatyenergosbyt», «Almaty elektr stansalary», «Alataý Jaryq» siiaqty ózderine qarasty kompaniialar qyzmetiniń oblysqa qatysty tustaryna ekpin túsire sholý jasady. Sol siiaqty, eń bastysy, aldaǵy ýaqytta qolǵa alatyn jobalaryna keńinen toqtaldy.
- Aldaǵy 10 jylda Qazaqstanda 10 myń MVt shamasynda elektr energiiasynyń tapshylyǵy týyndaýy múmkin ekeni boljanyp otyr. Bul rette Almaty oblysy biz úshin – eń mańyzdy óńir. Óitkeni Almaty oblysynda elektr óndirýge, sonyń ishinde jel, kún, sý kózderin paidalanýǵa tabiǵi múmkindikter kóp.
Sondyqtan búgin birqatar jobalarymyzdy tanystyryp, ákimdik tarapynan kómek qajet bolatyn máselelerdi jetkizsek deimiz.
Biz Ile aýdanynda ornalasqan «TETs-3» kásipornyn tabiǵi gazǵa aýystyrý máselesi boiynsha Almaty qalasymen birlesip jumys tobyn qurdyq.
Osy topqa arnaiy mamandaryńyzdy engizip, TEN, Tehnikalyq tapsyrma siiaqty qujattardyń ázirlenýin birlesip atqarsaq degen nietimiz bar. Biylǵy jyly Eńbekshiqazaq aýdanynda qýaty 60 MVt bolatyn jel elektr stansasyn iske qosýǵa daiyndalyp jatyrmyz. Keiin onyń qýatyn 300 MVt deiin arttyrý da oilastyrylǵan, - dedi A. Aidarov.
«Samuryq Energo» AQ ókili Shelek ózeninde GES 29 qurylysyna da daiyndyq jumystary júrip jatqanyn tilge tiek etti. Sol siiaqty Shelek energotoraby jelisin damytý jobasyn, «Qaskeleń» 220 kV QS 110kV Ashyq taratý qurylǵysyna qosylatyn 110/10 kV «Kókózek» qosalqy stansasynyń jáne Ile ózeninde qaita rettegish «Kerbulaq» GES-iniń qurylystaryn júrgizýge oblys ákimdiginiń jer ýchaskelerin qarastyrýǵa kómegi qajettigin aitty.
Kompaniia ókilderiniń sózin tyńdaǵan oblys ákimi:
- Almaty oblysynyń rasynda jańartylǵan energiia kózderin damytýǵa múmkindigi mol. Men eki-úsh kún buryn Úkimet otyrysynda osy taqyrypta habarlama jasadym. Búgin, mine, sol máseleni talqylaýdy ózderińizben jalǵastyryp otyrmyz. Kelgenderińizge qýanyshtymyn.
Energiia bar jerde tirshilik bar, ómir bar. Sondyqtan bul másele qashanda mańyzdy. Bul turǵyda bizdiń de óz josparlarymyz bar.
Taldyqorǵanda TETs salý jobasy qazir qarastyrylyp jatyr. Óitkeni qaladaǵy «Basqýat» jylytý qazandyǵy tehnikalyq jaǵynan tozǵan, úlken júktemeni kóterýge qaýqary shamaly. Soǵan bailanysty TETs jobasy bolashaqta myqty óndirýshi mekeme bolady dep oilaimyz. Odan ózge kún, jel, sý elektr energiiasyn shyǵarý jobalary da bar.
Bizdiń óńirdegi «Qorǵas» arnaiy ekonomikalyq aimaǵy qarqyndy damý núktesi sanalady. Osy aýmaqta elektr energiiasynyń jetispeýshiligi bar. Sol tapshylyqty boldyrmaýdy birlesip oilastyrsaq durys bolar edi, sizderge óz tarapymyzdan kómek kórsetýge ázirmiz. Jańaǵy aityp ótken jobalaryńyz boiynsha da biz aýdandarmen jumys jasaimyz, máseleler sheshimin tabady, - dedi Amandyq Batalov.
