Qazaqstanda eńbek naryǵynda suranysy joq mamandyqtar men bilim berý baǵdarlamalaryn qysqartý jumystary júrgizilip jatyr, dep habarlaidy dalanews.kz.
Oqý-aǵartý ministri Juldyz Súleimenovanyń aitýynsha, qazirgi ýaqytta tehnikalyq jáne kásiptik bilim berý mazmuny eńbek naryǵyndaǵy ózgeristerge qarai qaita qaralýda.
Búginde 552 kásiptik standart negizinde 14 494 bilim berý baǵdarlamasy ázirlengen. Onyń 4 348-i jumysshy biliktilikteri boiynsha iske asyrylyp otyr.
Sonymen qatar suranysqa ie emes baǵyttardy júieden shyǵarý josparlanǵan. Atap aitqanda, 32 mamandyqty, onyń ishinde 41 jumysshy biliktiligin alyp tastaý qarastyrylýda.
Buǵan deiin eńbek naryǵynyń talaptaryna sáikes kelmeitin 66 bilim berý baǵdarlamasy tizilimnen shyǵarylǵan.
Olardyń ornyna ekonomika men tehnologiialyq ózgeristerge bailanysty paida bolǵan jańa baǵyttar engizilip jatyr. Synyptaýysh 20 jańa mamandyqpen tolyqtyrylyp, osy baǵyttar boiynsha 243 bilim berý baǵdarlamasy ázirlengen.
Kolledj stýdentteriniń qosymsha quzyretterin keńeitý úshin mikrobiliktilikter men Minor baǵdarlamalaryn engizý de josparlanǵan.
Sonymen qatar jumysshy biliktilikteri boiynsha bilim berý baǵdarlamalaryna jasandy intellekt quraldaryn kásibi qyzmette paidalaný daǵdylary engizilýde.
Bilim berý baǵdarlamalarynyń tizilimi Career Enbek ulttyq biliktilik júiesiniń platformasymen integratsiialanǵan. Bul oqý baǵdarlamalarynyń mazmunyn kásiptik standarttarmen bailanystyrýǵa múmkindik beredi.
Ministrliktiń málimetinshe, kolledjderdiń bilim berý baǵdarlamalarynyń halyqaralyq talaptarǵa sáikestigin baǵalaý da jalǵasady. Qazirdiń ózinde 27 kolledjdiń baǵdarlamasy baǵalanǵan. 2027 jyldyń sońyna deiin taǵy 30 kolledjdi osy baǵalaýdan ótkizý josparlanyp otyr.
Súleimenova bul ózgeristerdiń negizgi maqsaty kolledjderde eńbek naryǵyna qajetsiz mamandardy daiarlaýdy azaityp, ekonomikaǵa qajetti kadrlardy kóbeitý ekenin atap ótti.
