Qazaqstanda ai saiynǵy zeinetaqy aýdarymy men onymen bailanysty jalaqy mólsherinde úlken aiyrma bary anyqtalyp otyr, dep habarlaidy Dalanews.kz.
Eńbek jáne halyqty áleýmettik qorǵaý ministri Svetlana Jaqypova 2024 jyly 14 qazanda QR Parlamentiniń Májilisinde Úkimet saǵatynda sóilegen sózinde elimizde formaldy emes jumyspen qamtýdyń joǵary deńgeii tirkelip otyrǵanyn basa atap ótti.
"2023 jyly naqty zeinetaqy aýdarymdarynyń derekteri boiynsha eseptelgen eńbekaqy tóleý qorynyń kólemi 20 trln teńgeni qurady. Óz kezeginde, Ulttyq statistika biýrosynyń baǵalaýy boiynsha eńbekaqy tóleý qory budan eki esege jýyq, iaǵni 38 trln teńgeden asady. Eńbekaqy qory boiynsha derekterdiń eń úlken alshaqtyǵy saýda, aýyl sharýashylyǵy jáne jyljymaityn múlik sektorlarynda baiqalady", - deidi ministr.
Degenmen vedomstvo málimetinshe, platformalyq jumyspen qamtýdyń jańa múmkindikteri bar.
"Barlyq eńbek qatynastaryn deklaratsiialaý boiynsha jumys sheńberinde ońailatylǵan tirkeý rásimin engize otyryp, platformalyq jumyspen qamtýdy retteý zańnamalyq túrde engizildi. Pilottyq joba aiasynda oǵan 19 myńnan astam taksi júrgizýshisi qosylyp, 20 mln-nan astam fiskaldyq chek jazyldy. Bul platformalyq jumyskerlerdi áleýmettik jáne zeinetaqymen qamsyzdandyrý júiesine integratsiialaý men zańdastyrýdaǵy mańyzdy qadam", - deidi Svetlana Jaqypova.
Sondai-aq, kásipodaqtardyń avtomattandyrylǵan jumys ornyn engize otyryp, eńbek jáne ujymdyq sharttar jasasýdyń tsifrlyq formatyna kóshý josparlanýda. Pilottyq rejimde elektrondy formatta 8,7 myńnan astam eńbek sharttary jasaldy.
EHÁQM basshysy aýyl sharýashylyǵynda jumyspen qamtýdy zańdyq turǵydan resimdeý aýyldyq aýmaqtardyń turaqty damýyn qamtamasyz etýdiń negizgi mindetteriniń biri bolyp tabylatynyn atap ótti.
"Ulttyq statistika biýrosynyń derekteri boiynsha elimizdiń aýyl sharýashylyǵyndaǵy 2023 jyly jumyspen qamtylǵan 1,1 mln jumyskerdiń jartysynan kóbi ózin-ózi jumyspen qamtyǵan adamdar. Olardyń jalaqysy respýblikalyq deńgeidegi ortasha eńbekaqydan eki ese derlik tómen. Bul formaldy emes jumyspen qamtýdyń joǵary deńgeiin jáne aýyl jumyskerleriniń áleýmettik qorǵalýynyń tómen deńgeiin kórsetedi", - deidi ministr.
Qalai degenmen de Eńbek ministrligi 2030 jylǵa qarai ábden teńdestirilgen eńbek naryǵyn qurýdy josparlap otyr. Atap aitqanda: ekonomikamyzda 3,8 mln sapaly jumys oryndarynyń bolýy; 1,7 million adamnyń tabysy mediandy jalaqydan joǵary bolýy; formaldy emes jumyspen qamtýdyń 15%-ǵa deiin tómendeýi; áleýmettik onlain-qyzmetter kórsetý indeksi boiynsha bizdiń elimiz álemdegi úzdik ondyqqa enýin.
