Almaty oblysynda ár apta saiyn ótetin «Taza Qazaqstan» ekologiialyq aktsiiasy aiasynda erekshe kezdesý uiymdastyryldy. Oblys ákimi Marat Sultanǵaziev kommýnaldyq qyzmetkerlermen birge jaǵajaidy qoqystan tazartyp, keiin qarapaiym jumysshylarmen tańǵy as ústinde áńgimelesti, dep habarlaidy dalanews.kz.
Qonaev qalasynyń tazalyǵyna jaýapty jumysshylar úshin bul kútpegen kezdesý boldy. Tańmen talasa turyp, kóshe sypyrýǵa shyǵatyn kommýnaldyq qyzmet mamandary óńir basshysymen birge tazalyq jumystaryn júrgizdi. Tipti kókeidegi suraqtaryn qoiyp, erkin pikir almasty.
Ákim eńbek adamdarynyń kúndelikti tirshiligine, jumys jaǵdaiyna, mamandyqtyń qiyndyǵyna jáne turǵyndardyń tazalyq mádenietine qatysty oiyn tyńdady. Resmi jiyndardaǵydai emes, ashyq formattaǵy áńgimede jumysshylar óz usynystary men máselelerin búkpesiz jetkizdi.
Tazalyq jumystary aiaqtalǵan soń kezdesý aq dastarhan basynda jalǵasty. Tańǵy as ústinde áńgime tek kommýnaldyq sala tóńireginde órbigen joq. Qatysýshylar óńirdiń damýy, kóshelerdiń tazalyǵy, otbasy, bala tárbiesi, kúndelikti ómir men eńbek adamdarynyń qoǵamdaǵy orny týraly da oi almasty.
Kommýnaldyq qyzmetkerler mundai kezdesýden erekshe áser alǵanyn jasyrmady. Olar, qarapaiym jumysshylarǵa kóńil bólip, ýaqyt tapqan oblys basshysyna rizashylyqtaryn bildirdi.
Kezdesý sońynda kommýnaldyq qyzmetkerlerge estelik syilyqtar tabystalyp, kóshe tazalyǵyna jaýapty jumysshylarǵa ákim alǵys aitty.
«Óńirdiń taza ári jaily bolýy – sizderdiń kún saiyn atqaryp júrgen jaýapty qyzmetterińizdiń nátijesi. “Taza Qazaqstan” tujyrymdamasy elimizdiń Konstitýtsiiasynda belgilengen negizgi qaǵidattardyń biri. Qorshaǵan ortany, týǵan jerimizdi taza ustaý barshamyzdyń mindetimiz. Osy maqsatta atqaryp júrgen eńbekterińiz úshin Sizderge shynaiy alǵysymdy bildiremin», – dedi oblys ákimi.
Aita keteiik, Almaty oblysynda ár apta saiyn “Taza beisenbi” sharasy turaqty túrde uiymdastyrylady. Oǵan turǵyndar, biznes ókilderi, jastar, qoǵam belsendileri men memlekettik mekeme qyzmetkerleri qatysýda. Al, eńbek adamdarynyń qoǵamdaǵy mártebesin arttyrý, ekologiialyq mádenietti nyǵaitý jáne jergilikti bilik pen turǵyndar arasyndaǵy ashyq dialogty damytýǵa baǵyttalǵan búgingidei kezdesýler aldaǵy ýaqytta da jalǵasyn tappaq. Bul-kommýnaldyq sala qyzmetkerleriniń usynystary men máselelerin tikelei tyńdap, olardyń eńbegine qurmet kórsetýge múmkindik beredi.
