Ulttyq statistika biýrosynyń aldyn ala derekterine sáikes, 2025 jyldyń qańtar-mamyr ailarynda Qazaqstannyń jalpy ishki ónimi byltyrǵy osy kezeńmen salystyrǵanda 6%-ǵa ósken. Mundai nátijege ónerkásip pen qurylys salalarynan bastap saýda, kólik jáne bailanysqa deiingi negizgi salalardaǵy ósim qarqynynyń jedeldeýi yqpal etken, dep habarlaidy Dalanews.kz.
Ulttyq ekonomika ministrligi baspasóz qyzmetiniń habarlaýynsha, ónerkásip óndirisi 6,4%-ǵa artty. Eldiń 17 óńirinde ósim baiqaldy: eń joǵary ósim +22,9% kórsetkishimen ken óndirý, tyńaitqyshtar, portlandtsement pen qant óndirisiniń belsendi damýynyń nátijesinde Jambyl oblysynda tirkeldi.
Túrkistan jáne Jetisý oblystarynda óndiris 14,8%-ǵa, Almaty qalasynda 14,1%-ǵa ósti. Shymkent qalasynda ósim 18,9%-ǵa jetti.
Aýyl sharýashylyǵyndaǵy ósim 4,0%-dy qurady (qańtar-sáýir ailaryndaǵy 3,9%-ben salystyrǵanda). Eń aiqyn ósim Atyraý oblysynda (+10,4%), Soltústik Qazaqstan oblysynda (+7,5%) jáne Aqmola oblysynda (+6,5%) tirkeldi, bul negizinen mal men qus soiymynyń artýy esebinen boldy. Túrkistan oblysynda ósim 6,3%-dy, Abai oblysynda – 3,6%-dy, al Qostanai oblysynda – 4,8%-dy qurady.
Qurylys salasy qarqyndy damyp keledi, 15,4%-ǵa ósti. 18 óńirde ósim tirkeldi, al Mańǵystaý oblysynda mektepter, tushytqysh zaýyt, munai jáne sý qubyrlaryn qaita jańartý, aýdandyq aýrýhana jáne avtojoldardy jóndeý siiaqty aýqymdy jobalardyń arqasynda jumys kólemi eki esege artty. Qyzylorda oblysynda ósim 64,5%-dy, Qostanaida – 57,8%-dy, Astanada – 51,8%-dy, Túrkistan oblysynda – 46,6%-dy qurady. Turǵyn úi qurylysy da qarqyn alyp keledi: bes aidyń ishinde 6 mln sharshy metrden astam turǵyn úi paidalanýǵa berildi, bul byltyrmen salystyrǵanda 5,7%-ǵa kóp. Eń belsendi qurylys Túrkistan oblysynda (+25,5%), Shymkent qalasynda (+23,4%) jáne Almaty oblysynda (+20,4%) baiqaldy.
Negizgi kapitalǵa salynǵan investitsiia 18,2%-ǵa artty. Bul ósim kólik, óndiristik jáne áleýmettik infraqurylymǵa, sondai-aq jabdyqtar men jańa ónerkásiptik nysandarǵa baǵyttalǵan qarjy salymdarynyń esebinen qamtamasyz etildi.
Saýda ainalymy 7,8%-ǵa artty (qańtar-sáýir aiynyń qorytyndysyndaǵy 7,0%-ben salystyrǵanda). Ishki saýda qurylymynda kóterme saýdanyń úlesi shamamen 68%-dy quraidy. Aǵymdaǵy jyldyń qańtar-mamyr ailarynda kóterme saýda 8,3%-ǵa, bólshek saýda 6,5%-ǵa ósti. Ósim qarqyny boiynsha Túrkistan oblysy (+66,2%), Aqmola oblysy (+48,9%) jáne Shymkent qalasy (+23,1%) aldyńǵy qatarda.
Bailanys jáne telekommýnikatsiia salasy 2,8%-ǵa ósti. Bul Internet jelisi qyzmetteri esebinen (+13,9%).
Kólik salasy 23,1%-dyq ósim kórsetti — bul kóbinese júk temirjol kóliginiń (+17%) jáne qubyr arqyly tasymaldaýdyń ósýinebailanysty (+13,8%). Eń joǵary ósim Jetisý oblysynda (+39,1%), Abai oblysynda (+17,7%) jáne Aqtóbe oblysynda (+11,3%) tirkeldi.
Aita ketsek, saiasattanýshy Daniiar Áshimbaev Qazaqstan ekonomikasy, onyń damý barysyndaǵy Úkimet músheleriniń úlesine qatysty óz pikirin bildirdi. Maman bul rettegi múshkil háldi búginderi keibir ministrlerdiń kelemej, ýáj nysanyna ainalýyn mysalǵa keltire otyryp, synady. Sondai-aq buǵan deiin saitymyzda "2025 jylǵy investitsiialyq ósim nemese sarapshylar Úkimet esebinen tompaq tusty anyqtady" degen maqala jariialanǵan bolatyn.
