Astanada «Zań men tártip» tujyrymdamasy aiasynda qoǵamdyq qaýipsizdikti qamtamasyz etý jáne tótenshe jaǵdailardyń aldyn alý baǵytyndaǵy túsindirý jumystary jalǵasyp jatyr. Jylytý maýsymynda elordalyq qutqarýshylar qala turǵyndaryna úilerge kómirtegi totyǵy men tabiǵi gaz datchikterin, sondai-aq tútin habarlaǵyshtaryn ornatýdyń mańyzyn eske saldy, dep habarlaidy dalanews.kz.
Mamandardyń aitýynsha, bul qurylǵylar gazdyń taralýyn, kómirtegi totyǵynyń qaýipti deńgeige jetýin jáne órt kezinde tútinniń paida bolýyn der kezinde anyqtaýǵa múmkindik beredi. Osylaisha, turǵyndar qaýip týraly erterek bilip, qajetti sharalardy qabyldai alady.
Qutqarýshylar qurylǵylardyń jumysyn júieli túrde tekserip, batareialarynyń jaramdylyǵyn baqylaýdy jáne qajet bolǵan jaǵdaida ýaqytyly aýystyrýdy usynady. Sonymen qatar jeldetý júiesi men gaz jabdyqtarynyń durys jumys isteýin qadaǵalap, órt jáne gaz qaýipsizdigi talaptaryn saqtaý qajet.
Gaz datchigi iske qosylǵan jaǵdaida, turǵyndar dereý úi-jaidan shyǵýy tiis. Mundai kezde elektr qurylǵylaryn qosýǵa nemese ajyratýǵa, sondai-aq ashyq otty paidalanýǵa bolmaidy. Qaýipsiz jerge shyqqannan keiin 104 nemese 112 nómirine habarlaý qajet.
Al órt shyqqan jaǵdaida ǵimarattan tez arada evakýatsiialanyp, 101 nemese 112 nómirine qońyraý shalý kerek.
Qutqarýshylardyń aitýynsha, jaramdy gaz datchikteri men tútin habarlaǵyshtaryn ornatý – adam ómiri men densaýlyǵyn qorǵaýdyń, sondai-aq turmystyq tótenshe jaǵdailardyń aldyn alýdyń mańyzdy sharalarynyń biri. Qaýipsizdik talaptaryn saqtaý – árbir azamattyń jaýapkershiligi.
